ब्रेकिंग

अर्थ

बीएसई आणि एमसीएक्स : दोन अढळ तारे

Samruddhi Dhayagude
09 Jun 2025

भाग्यश्री पटवर्धन

एखाद्या कंपनीच्या शेअर भावात वाढ होत असली तरी त्याची नेमकी कारणे आणि पूर्वेतिहास, बाजारबाह्य घटक आणि त्याचे परिणाम याचाही विचार गुंतवणूक करताना करणे कसे गरजेचे आहे, हे एमसीएक्स आणि बीएसईवरून कळेल.

देशातील जे बाजार शेअर बाजारात नोंदलेले आहेत, ते सध्या तरी दोनच आहेत. पहिली कंपनी म्हणजे शेअर बाजाराची आद्य प्रवर्तक मुंबई शेअर बाजार बीएसई. दुसरी मल्टी कमोडिटी एक्स्चेंज म्हणजे एमसीएक्स. राष्ट्रीय शेअर बाजार म्हणजे एनएसई कधी नोंद होणार याची गुंतवणूकदार आतुरतेने वाट पाहत आहेत. शेअर वगळून इतर वस्तूंचे व्यवहार ज्या मंचावर केले जातात, तो म्हणजे एमसीएक्स. ही कंपनी गेल्या आठवड्यात चर्चेत आली. कारण त्याचे भाव काही दिवसात सुमारे नऊ टक्के वधारले!

शेअर वधारण्यामागे जे महत्वाचे कारण आहे ते आधी पाहू. कमॉडिटी फ्यूचर्स ट्रेडिंगमध्ये एमसीएक्सचा हिस्सा ९८ टक्के आहे. सेबीने नुकतीच इलेक्ट्रिसिटी डेरीवेटिव्ह व्यवहार सुरु करण्यास एमसीएक्सला परवानगी दिल्याचे मुख्याधिकारी प्रविणा राय यांनी गेल्या आठवड्यात जाहीर केले आणि हा शेअर तुफान तेजी दाखवू लागला. हा लेख लिहिताना मागील आठवड्यात एमसीएक्सच्या शेअरने ७००० रुपयांची पातळी ओलांडली. कंपनी नवा व्यवहार मंच सुरु करणार या शक्यतेने आगामी काळात त्यावरील व्यवहार वाढतील आणि पर्यायाने उलाढाल वाढून नफा क्षमता वाढेल.

या शक्यतेने भाव वधारले आहेत. बीएसईने केवळ आठ वर्षात पाचपट परतावा दिला आहे. या परताव्यात लाभांशाची रक्कम गृहीत धरलेली नाही. पूर्वी ज्यांच्याकडे १८ शेअर आहेत, त्यांना एकास दोन या प्रमाणे ३६ शेअर मिळाले. इथे एक मुद्दा लक्षात घ्यायला हवा की, ज्यांनी दीर्घकाळ गुंतवणूक केली, त्यांना हा परतावा दिसतो आहे.

शेअर बाजारात पी हळद अन् हो गोरी असे झटपट पैसे मिळत नाहीत! थांबा आणि वाट पहा, हेच धोरण लाभदायक ठरते. एखादे एक्सचेंज कंपनी म्हणून जेव्हा बाजारात नोंदली जाते तेव्हा त्याची ताकद किती असते हे यावरून लक्षात येते.

शिफारस आणि परतावा :

‘केसरी’मध्ये (२४ नोव्हेंबर २०२३ आणि ३ एप्रिल २०२५) गुंतवणूक मित्र या सदरात प्रसिद्ध झालेल्या लेखात ज्या शेअरचा उल्लेख करण्यात आला होता त्यातील दोन कंपन्यांनी किती परतावा दिला हे त्यांचे आजचे भाव पाहून कळेल. ज्या गुंतवणूकदार वाचकांनी लेख प्रसिद्ध झाल्याच्या आठवड्यात गुंतवणूक केली, त्यांना फायदा झाल्याचे लक्षात येईल. शिफारस केली तेव्हा एमसीएक्सचा भाव २९२० होता. (सध्याचा भाव ५२- wk high सह ७,५३१.०० ५२-wk low ३,४६५.८०) बीएसईचा शेअर भाव त्यावेळी खरेदी करणार्‍यांच्या पदरात भरभरुन माप पडले आहे. बीएसईचा गेल्या शुक्रवारचा भाव २९३३ रुपये होता.