ब्रेकिंग

देश

अमरनाथ यात्रेचा कालावधी केला कमी

Samruddhi Dhayagude
06 Jun 2025

यंदा यात्रा ३८ दिवसच चालणार

नवी दिल्ली : यंदाच्या वर्षी अमरनाथ यात्रेचा कालावधी कमी करण्यात आला आहे. ही यात्रा ३ जुलैपासून सुरू होणार असून ती ३८ दिवस चालेल. गेल्या वेळी अमरनाथ यात्रा ५२ दिवसांची होती. पहलगाम दहशतवादी हल्ल्यानंतर, जम्मू-काश्मीरमधील पवित्र तीर्थक्षेत्राच्या सुरक्षेसाठी मोठी सुरक्षा योजना तयार करण्यात आली आहे. यासाठी एक सुनियोजित रणनीती आखण्यात आली असून, ज्यामध्ये सीआरपीएफ, जम्मू-काश्मीर पोलिस आणि सैन्य यांचा समावेश आहे.

सुरक्षा ऑडिट आणि डिजिटल मॅपिंग पूर्ण

सुरक्षेसाठी सीआरपीएफ आणि इतर निमलष्करी दलांच्या एकूण ५८१ कंपन्या तैनात केल्या जातील. याशिवाय जम्मू-काश्मीर पोलिसही उपस्थित असतील. सर्व सुरक्षा मार्गांचे सुरक्षा ऑडिट आणि डिजिटल मॅपिंग करण्यात आले आहे. सीआरपीएफचे डीजी स्वतः पहलगामला गेले आणि सुरक्षेचा आढावा घेतला. प्रत्येक प्रवासी आणि पोनी रायडरसाठी एक डिजिटल ओळखपत्र तयार केले जाईल.

आयईडी स्फोटांसारख्या घटना रोखण्यासाठी यात्रा ताफ्यात जॅमर असतील. सुरक्षा कर्मचार्‍यांकडे सॅटेलाइट फोन असतील. प्रवाशांना आणि गाड्यांमध्ये रेडिओ फ्रिक्वेन्सी आयडेंटिफिकेशन असेल. यात्रेत पोलिस आणि सीआरपीएफच्या स्वतंत्र समर्पित पीसीआर व्हॅन असतील. केंद्रीय गृहमंत्री अमित शहा यांनी ३० मे रोजी सर्व सुरक्षा विभागांना आगामी अमरनाथ यात्रा पूर्णपणे शांततेत पार पडावी यासाठी दक्षता आणि खबरदारी घेण्याचे निर्देश दिले.

गृहमंत्री अमित शहा यांच्या अध्यक्षतेखाली झालेल्या या उच्चस्तरीय सुरक्षा आढावा बैठकीत उपराज्यपाल मनोज सिन्हा, केंद्रीय गृहसचिव गोविंद मोहन, लष्करप्रमुख जनरल उपेंद्र द्विवेदी, जम्मू आणि काश्मीरचे मुख्य सचिव अटल दुल्लू, डीजीपी नलिन प्रभात आणि गृह मंत्रालयाचे इतर उच्च अधिकारी, लष्कर, निमलष्करी दल, जम्मू आणि काश्मीर पोलिस, नागरी प्रशासन आणि केंद्र आणि केंद्रशासित प्रदेशातील गुप्तचर संस्था उपस्थित होत्या.

तयारीचा घेतला आढावा

अमित शहा म्हणाले, केंद्र आणि केंद्रशासित प्रदेश प्रशासन यात्रेकरूंना सर्व आवश्यक सुविधा पुरवण्यात कोणतीही कसर करणार नाही. यात्रेकरूंसाठी सुरक्षा व्यवस्था आणि तयारीचा आढावा घेण्यात आला आहे.