ब्रेकिंग

विदेश

मदत केंद्रांकडे जाणार्‍या नागरिकांवर इस्रायलचे हल्ले सुरूच

Samruddhi Dhayagude
05 Jun 2025

मागील २४ तासांत ९५ पॅलेस्टिनी ठार; मदत थांबवली

खान युनूस, (गाझा पट्टी) : इस्रायली सुरक्षा दलांनी गेल्या २४ तासांत गाझा पट्टी ओलांडून मदत वितरण केंद्राकडे जाणार्‍या नागरिकांवर हल्ला केला. यात ९५ पॅलेस्टिनी ठार झाले आणि ४४० जण जखमी झाले आहेत. गेल्या तीन दिवसांत मदत वितरण केंद्रात येणार्‍या नागरिकांवर गोळीबार होण्याची ही तिसरी घटना आहे. या घटनेनंतर पॅलेस्टिनी नागरिकांना देण्यात येणारी मदत एक दिवसासाठी थांबविण्यात आल्याचे गाझा येथील आरोग्य मंत्रालयाने सांगितले.

या हल्ल्यानंतर सुरक्षा दलांशी संघर्ष करणार्‍या काही संशयितांवर गोळीबार केल्याचे इस्रायली सैन्याने म्हटले आहे. इस्रायली लष्कराचे प्रवक्ते एफी डेफ्रिन म्हणाले की, हमासने मृतांची संख्या अतिशयोक्तीपूर्णपणे दाखवली आहे, या प्रकरणाची चौकशी केली जात आहे. सैन्य पॅलेस्टिनींना वितरण क्षेत्रातील मदत केंद्रांपर्यंत पोहोचण्यापासून रोखत नाही तर त्यांना तिथे जाण्याची परवानगी देत आहे.

मदत वितरण केंद्र चालवणार्‍या गाझा ह्युमॅनिटेरियन फाउंडेशनने म्हटले आहे की, मदत वितरण स्थळी किंवा जवळ कोणताही हिंसाचार झालेला नाही. इस्रायली सैन्य वितरण केंद्रापासून दूर जाणार्‍या सुरक्षित कॉरिडॉर आणि घेरलेल्या लष्करी क्षेत्रातून बाहेर पडल्यानंतर हल्ले करत आहे. सुरक्षित कॉरिडॉरमधून पळून जाताना अनेक नागरिकांचा मृत्यू झाला. तर काही जण जखमी झाले आहेत. गोळीबाराची ही घटना फाउंडेशनच्या वितरण स्थळापासून सुमारे एक किलोमीटर अंतरावर घडली.

इंटरनॅशनल कमिटी ऑफ द रेडक्रॉसचे प्रवक्ते हिशाम म्हाना यांनी मृतांच्या संख्येची पुष्टी केली आणि सांगितले की १८४ जखमींना राफा येथील रूग्णालयात दाखल करण्यात आले आहे. यामधील बहुतेक रुग्णांना गोळ्या लागल्या आहेत.दरम्यान, संयुक्त राष्ट्रांनी मदत केंद्रांची ही नवीन व्यवस्था नाकारली आहे.