ब्रेकिंग

विदेश

तुर्की भूकंपाने हादरला;एका बालकाचा मृत्यू

Wrutuja pandharpure
03 Jun 2025

गच्ची, खिडक्यांतून अनेकांनी मारल्या उड्या

अंकरा : तुर्कीला मध्यरात्री भूकंपाचा धक्का बसला. समुद्र किनारपट्टी परिसरात ५.८ रिश्टर स्केल क्षमतेचा भूकंप झाला. एका बालकाचा मृत्यू झाला असून अनेक नागरिक जखमी झाले.भूकंपाच्या हादर्‍याने घरे हादरली. गच्ची आणि खिडक्यांतून अनेक जणांनी जिवाच्या आकांताने आणि घाबरून उड्या मारल्या. त्यात अनेक जण जखमी झाले. गंभीर जखमी बालकाला रुग्णालयात दाखल केले. डॉक्टरांनी त्याचा मृत्यू झाल्याचे सांगितले.

भूमध्य सागरात भूकंपाचा केंद्रबिंदू होता. रात्री अडीच वाजण्याच्या सुमारास हादर्‍याने झोपेतून जागे झालेले नागरिक घाबरुन घराबाहेर पडले. भूकंपाचे धक्के ग्रीकचे बेट रोहडस येथेही जाणवले. दरम्यान, गच्ची आणि खिडक्यांतून उडी मारलेले ७० नागरिक जखमी झाले. भूकंपाने कोणत्याही इमारतींचे नुकसान झाले नसल्याचे प्राथमिक वृत्त आहे. दरम्यान, २०२३ मध्ये प्रलंयकांरी भूकंपाचा धक्का बसला होता. ७.८ रिश्टर स्केल क्षमतेचा तो होता. हजारो इमारती पत्त्याच्या बंगल्याप्रमाणे कोसळल्या होत्या. ५३ हजार नागरिकांचा तर, सीरियाच्या उत्तर भागात ६ हजारांवर नागरिकांचा मृत्यू झाला होता. पुन्हा भूकंप झाल्याने २०२३ मधील भूकंपाच्या आठवणी पुन्हा जाग्या झाल्या आहेत.