ब्रेकिंग

विदेश

इराणने लष्करी दर्जाच्या युरेनियमचा साठा वाढवला

Samruddhi Dhayagude
02 Jun 2025

संयुक्त राष्ट्रांच्या संस्थेचा दावा

तेहरान : इराणने युरेनियम समृद्धीचा साठा लष्करी दर्जाच्या पातळीपर्यंत वाढवला आहे, असे संयुक्त राष्ट्रांच्या अणुऊर्जा वॉचडॉगच्या एका गोपनीय अहवालात म्हटले आहे. मात्र, इराणने हा दावा फेटाळला आहे.

अमेरिकेचे अध्यक्ष डोनाल्ड ट्रम्प ज्या संभाव्य अणुकरारापर्यंत पोहोचण्याचा प्रयत्न करीत आहेत, त्यावर तेहरान आणि वॉशिंग्टन यांच्यात चर्चेच्या फेर्‍या सुरू असताना हा अहवाल आला आहे. इराणने शुद्ध युरेनियमचा साठा ६० टक्क्यांनी वाढवला आहे. हे युरेनियम शस्त्रांसाठीही वापरले जाऊ शकते. त्यामुळे संयुक्त राष्ट्रांच्या अणुऊर्जा संस्थेने इराणला सहकार्य वाढवण्याचे आणि त्यांचे धोरण बदलण्याचे आवाहन केले आहे.

अहवालानुसार, १७ मे पर्यंत इराणने ६० टक्के शुद्धतेचे ४०८.६ किलो युरेनियम जमा केले होते. हे फेब्रुवारीपेक्षा ५० टक्के जास्त आहे. युरेनियमची ही पातळी ९० टक्के शुद्ध शस्त्रास्त्र-ग्रेड युरेनियमपासून केवळ एक पाऊल दूर आहे. जर ६० टक्के सामग्री असलेले ४२ किलो युरेनियम अधिक शुद्ध केले तर ते अणुबॉम्ब बनवण्यासाठी वापरले जाऊ शकते. इराणचा एकूण समृद्ध युरेनियम साठा आता ९ हजार २४७.६ किलो आहे. इराणकडे अणुबॉम्ब बनवण्याइतके युरेनियम आहे.दरम्यान, इराणच्या परराष्ट्र मंत्रालयाने आणि अणुऊर्जा संघटनेने हा अहवाल चुकीचा आणि पक्षपाती असल्याचे म्हटले आहे. हा अहवाल अविश्वसनीय माहितीवर आधारित आहे आणि राजकीय दबावाखाली तयार करण्यात आला आहे. इराणचा अणुकार्यक्रम इस्लामिक तत्त्वे आणि आंतरराष्ट्रीय कायद्यानुसार आहे, असे इराणने म्हटले आहे.