ब्रेकिंग

राजाराम पूल वाहतुकीसाठी बंद केल्याने कोंडी

Wrutuja pandharpure
02 May 2025

ठेकेदार कंपनीला महापालिकेची नोटीस

पुणे : महापालिका प्रशासनाला कल्पना न देता सिंहगड रोड व कर्वे नगरला जोडणारा छत्रपती राजाराम पुल वाहतुकीसाठी बंद केल्याने नागरिकांना अभूतपूर्व कोंडीचा सामना करावा लागला. यानंतर सर्वच स्तरांतून प्रखर टीका झाल्यानंतर एक्सपान्शन जॉइंटचे काम करणारर्‍या ठेकेदार कंपनीला महापालिकेने नोटीस बजावली आहे. याबाबत तीन दिवसात खुलासा देण्याचे आदेश देतानाच निविदेतील अटी व शर्तीनुसार कारवाई करण्याचा इशारा दिला आहे.

महापालिकेच्या प्रकल्प विभागाने शहरातून वाहनार्‍या नदीवरील विविध पूल व उड्डाणपुलांचे स्ट्रक्चरल ऑडिट केले आहे. यामध्ये ११ पुलांचे बेअरिंग व एक्सपान्शन जॉइंटचे कामे करावी लागणार आहेत. त्यानुसार प्रकल्प विभागाने पूना हॉस्पिटल, एस. एम. जोशी आणि संगमवाडी येथील पुलाचे काम केले आहे. छत्रपती राजाराम पुलाच्या एक्सपान्शन जॉइंटचे काम केले जाणार आहे. या पुलाची एक बाजू वाहतुकीसाठी एक महिना बंद करून हे काम केले जाणार आहे. त्यानंतर दुसरी बाजू बंद ठेवून दुसर्‍या बाजूचे काम केले जाणार आहे. दोन्ही बाजूचे काम किमान दोन महिने चालणार आहे.

मात्र, हे काम करणार्‍या द फ्रेसीनेट प्रेस्ट्रेस्ड काँक्रीट कंपनीने महापालिका प्रशासनाला कसलीही कल्पना न देता सोमवारी सकाळी छत्रपती राजाराम पुलाची एक बाजू वाहतुकीसाठी बंद करून एक्सपान्शन जॉइंटचे काम सुरू केले. यामुळे सिंहगड रस्त्यावर व कर्वे नगरमध्ये अभूतपूर्व वाहतुक कोंडी झाली. मोठ्या प्रमाणात वाहतुक कोंडी झाल्याने आरद्या तासात काम बंद करून पुल वाहतुकीसाठी खुला करण्यात आला. मात्र, नागरिकांना पुढील चार ते पाच तास वाहतुक कोंडीची झळ सहन करावी लागली. यावरून महापालिका प्रशासनावर मोठ्या प्रमाणात टीका झाल्यानंतर प्रकल्प विभागाने काम करणार्‍या द फ्रेसीनेट प्रेस्ट्रेस्ड काँक्रीट कंपनीला नोटीस बजावली आहे. याबाबत तीन दिवसात खुलासा द्यावा, असे आदेश देत निविदेतील अटी व शर्तीनुसार कारवाई करण्याचा इशारा नोटीसद्वारे दिला आहे.