News - Daily Kesari

देश

विमानाचा ब्लॅक बॉक्स सापडला

Wrutuja pandharpure
14 Jun 2025

अहमदाबाद दुर्घटनेचे गूढ उकलणार

अहमदाबाद : अहमदाबाद ते लंडन प्रवास करणार्‍या एअर इंडियाच्या बोइंग ७८७-७ ड्रीमलायनर या अपघातग्रस्त विमानाचा ब्लॅक बॉक्स शुक्रवारी अखेर सापडला आहे. दुर्घटनेनंतर सुमारे २७ तासानंतर डॉक्टरांच्या वसतीगृहाच्या इमारतीवर तो सापडला आहे. त्यामुळे विमान दुर्घटनेचे गूढ उकलण्यास अधिक मदत मिळणार आहे.

विमान अपघात तपास संस्था (एएआयव्ही) ने काल सांगितले की, विमानाचा ब्लॅक बॉक्स वसतिगृहाच्या इमारतीवर सापडला आहे. ब्लॅक बॉक्स डेटावरून, विमानात काय बिघाड होता हे कळेल. कारण बोइंग ७८७ विमान हे एक आधुनिक आहे. ज्यामध्ये वैमानिकाच्या इनपुट व्यतिरिक्त बरेच सेन्सर्स, यंत्रसामग्री आणि ऑटोमेशन यंत्रणा असते, असे संस्थेने सांगितले.. तांत्रिक बाबी किंवा फ्लॅप किंवा इंजिन नियंत्रणाच्या बाबतीत बर्‍याच चुका झाल्या असण्याची शक्यता आहे. त्यामुळे आता ब्लॅक बॉक्सवरील चौकशी अहवालाची वाट पाहावी लागेल आणि ब्लॅक बॉक्स रेकॉर्डिंगमधून जो काही डेटा मिळाल्यानंतर प्रत्यक्षात काय घडले आणि अपघाताचे खरे कारण काय होेते ? याचा तपशील प्राप्त होण्यास मदत मिळणार आहे.

अहमदाबाद येथील सरदार वल्लभभाई पटेल आंतरराष्ट्रीय विमानतळावरुन गुरुवारी दुपारी विमानाने उड्डाण केले होते. त्यानंर काही क्षणात ते कोसळले होते. यानंतर विमानात स्फोट होऊन आग लोळात ते कोसळले होते. याच दरम्यान, विमानाच्या शेपटीचा भाग मेघनानगर येथील वैद्यकीय महाविद्यालयाच्या डॉक्टरांच्या वसतिगृहावर अडकला होता दुर्घटनेत एकूण २६५ जणांचा मृत्यू झाला आहे. त्यापैकी २४१ जण विमानातील आणि पाच वैद्यकीय विद्यार्थी होते. विमानातील ब्रिटनचा एकमेव प्रवासी आश्चर्यकारकरित्या बचावला. वसतिगृहातील ६० पेक्षा अधिक जण जखमी झाले होते.

वैमानिकाकडून मे डे चा अखेरचा संदेश

विमानाने दुपारी दीड वाजण्याच्या सुमारास यशस्वी उड्डाण केले. त्यानंतर वैमानिकाने मे डे हा धोक्याचा संदेश हवाई वाहतूक नियंत्रक कक्षाकडे पाठवला होता. विमानात बिघाड झाल्याचा इशारा तो होता. त्यानंतर आणीबाणीजन्य परिस्थिती निर्माण झाली होती, असे केंद्राने स्पष्ट केले. नंतर काही क्षणांत विमान कोसळले होते.