News - Daily Kesari

विदेश

विमान अपघातातील दृश्ये भयानक : स्टॉर्मर

Wrutuja pandharpure
13 Jun 2025

लंडन : विमानाच्या अपघाताबद्दल ब्रिटनचे पंतप्रधान केयर स्टॉर्मर यांनी गुरुवारी शोक व्यक्त केला. विमानात एकूण २४२ प्रवासी होते, ज्यात ५३ ब्रिटिश नागरिक होते. अनेक ब्रिटिश नागरिकांना घेऊन लंडनला येणार्‍या विमानाचा भारतातील अहमदाबाद शहरात अपघात झाल्याचे दृश्य भयानक आहेत, असे स्टॉर्मर यांनी एका निवेदनात म्हटले आहे.

ते म्हणाले, मला मिनिटा-मिनिटाला याबाबत माहिती दिली जात आहे. या अत्यंत दुःखद काळात आम्ही प्रवासी आणि त्यांच्या कुटुंबीयांसोबत आहोत. ब्रिटनचे परराष्ट्र सचिव डेव्हिड लॅमी यांनी समाज माध्यमावर पीडितांप्रती शोक व्यक्त केला आहे. ते म्हणाले, भारतातील अहमदाबाद येथे झालेल्या भयानक विमान अपघाताची बातमी ऐकून खूप दुःख झाले. पीडितांसोबत माझ्या संवेदना आहेत. पीडितांना मदत पुरवण्यासाठी यूके सरकार भारतात सरकारसोबत काम करत आहे.

यूके फॉरेन, कॉमनवेल्थ अँड डेव्हलपमेंट ऑफिसने (एफसीडीओ) सांगितले, की ते भारतातील स्थानिक अधिकार्‍यांसोबत जवळून काम करत आहे. जेणेकरून यातील पीडितांना लवकरात लवकर मदत करता येईल. यासाठी एक संपर्क क्रमांक देखील जारी करण्यात आला आहे. ज्या ब्रिटिश नागरिकांना मदतीची आवश्यकता आहे, किंवा ज्यांना त्यांचे प्रियजन किंवा कुटुंबाबद्दल माहिती हवी असल्यास त्यांनी ०२० ७००८ ५००० वर कॉल करावा, असे एफसीडीओने म्हटले आहे.