News - Daily Kesari

गुन्हेगारी जगत

नर्‍हे परिसरात दुचाकी पेटवणारा ताब्यात

Wrutuja pandharpure
13 Jun 2025

पुणे : नर्‍हे येथील एका सोसायटीमध्ये लावलेल्या सात दुचाकी पेटवून पसार झालेल्या सराईताला गुन्हे शाखेच्या युनिट तीनच्या पथकाने त्याच्या अल्पवयीन साथीदारासह ताब्यात घेतले. सिद्धेश नितीन धुमाळ (वय २३, घोरपडी पेठ) असे अटक करण्यात आलेल्याचे नाव आहे. त्याच्या अल्पवयीन साथीदाराला ताब्यात घेण्यात आले आहे. याप्रकरणी, एकाने सिंहगड रस्ता पोलिस ठाण्यात तक्रार दिली होती.

सिद्धेश हा सराईत गुन्हेगार आहे. त्याचा मित्र नर्‍हे येथील सिद्धेश्वर प्लाझा या इमारतीत राहतो. सिद्धार्थ हा मंगळवारी रात्री त्याच्या मित्रासोबत फिरायला गेला होता. सिद्धार्थने त्याच्या मित्राला रात्री उशिरा घरी सोडण्यास सांगितले. या कारणावरून त्यांच्यात वाद झाला. त्यानंतर, सिद्धेश आणि त्याचा अल्पवयीन साथीदार मध्यरात्री सोसायटीत आले. त्यांनी तळमजल्यावरील मित्राच्या दुचाकीवर पेट्रोल ओतून ती पेटवून दिली. शेजारी असलेल्या सहा दुचाकींनी पेट घेतला.