News - Daily Kesari

देश

सासूशी फोनवर खोटे बोलल्यानेच सोनम आली पोलिसांच्या रडारवर

Samruddhi Dhayagude
11 Jun 2025

नवी दिल्ली : सोनम रघुवंशीला तिच्या पतीची हत्या केल्याच्या आरोपात अटक करण्यात आली आहे. सोनमचा तिच्या पतीच्या हत्येत सहभाग होता असा दावा मेघालय पोलिसांनी केला आहे. लुटीच्या उद्देशाने काही लोक आले, त्यांनी राजाला मारले असे भासवून सोनमला काही काळ त्याची विधवा म्हणून राहायचे होते. त्यानंतर तिला राज कुशवाह याच्याशी लग्न करायचे होते. सोनम राज कुशवाहबाबत तिच्या कुटुंबाला समजावून सांगणार असे ठरले होते. मात्र, एक चूक झाली ती खोटे बोलली आणि सगळा कट फसला.

राजा रघुवंशी पत्नी सोनमला घेऊन शिलाँग या ठिकाणी मधुचंद्राला गेला होता त्याच ठिकाणी त्याची हत्या झाली. राजा इंदूरमध्ये ट्रान्सपोर्टचा व्यवसाय करत होता. या हत्येचा तपास विशेष तपास पथकाकडून केला जात आहे. दरम्यान, बेपत्ता होण्यापूर्वी सोनमने तिच्या सासूला म्हणजेच राजा रघुवंशीच्या आईला फोन केला होता. मी आज उपास केला आहे, पतीच्या आरोग्यासाठी मी उपास करते आहे. या फोनवरुन जेव्हा विशेष तपास पथकाने शोध घेतला तेव्हा त्यांना समजले, की ज्या हॉटेलमध्ये सोनम आणि राजा राहिले होते तिथे ती व्यवस्थित जेवली होती. तिने उपास वगैरे काहीही केला नव्हता. ती खोटे का बोलली असेल? हा प्रश्न पडला आणि ती पोलिसांच्या रडारवर आली. ज्यानंतर पोलिसांनी तिचे कॉल रेकॉर्ड तपासले आणि सोनम राज कुशवाह या तिच्या प्रियकराच्या संपर्कात होती हे पोलिसांना समजले.

सोनमचा राजला मेसेज

मेसेजमध्ये सोनमने म्हटले आहे, की राजा रघुवंशी तिच्याशी जवळीक साधतो आहे, प्रेम करतो आहे हे मला मुळीच आवडत नाही. सोनमने असा टेक्स्ट मेसेज तिचा प्रियकर राज कुशवाहाला केला होता, अशी माहिती सूत्रांनी दिली आहे.