News - Daily Kesari

महाराष्ट्र

शालेय बस चालकांची दर आठवड्याला मद्यपान चाचणी

Wrutuja pandharpure
08 Jun 2025

मुंबई : विद्यार्थ्यांच्या सुरक्षित वाहतुकीसाठी शालेय बस चालकांची दर आठवड्याला मद्यपान चाचणी करण्याचा निर्णय शालेय शिक्षण विभागाने घेतला आहे. शालेय शिक्षण विभागाने जारी केलेले नवीन नियम राज्यातील सर्व शाळांना लागू करण्यात आले आहेत.

नव्या नियमांनुसार, बसचालकांची ओळख आणि पार्श्वभूमी तपासणे शाळांना बंधनकारक करण्यात आले आहे. दर आठवड्याला चालक, महिला परिचारिका आणि स्वच्छता कर्मचार्‍यांची मद्यपान आणि अमली पदार्थ तपासणी सक्तीची करण्यात आली आहे. तसेच अनधिकृत व्यक्ती बसमध्ये प्रवेश करणार नाही. तसेच खासगी वाहनांमधून येणार्‍या विद्यार्थ्यांच्या पालकांनी चालकाची ओळख व पार्श्वभूमी शाळेला कळवावी, अशी सूचनाही शासन निर्णयामध्ये करण्यात आली आहे.

तसेच विद्यार्थ्यांसाठी खासगी वाहतूक व्यवस्थेचा वापर करणार्‍या पालकांनी शाळा व्यवस्थापनाला चालकाची पडताळणी आणि ओळख तपशीलांची माहिती देणे आवश्यक आहे. बसमध्ये जीपीएस आणि सीसीटीव्ही कॅमेरे बसवणे, दर सहा महिन्यांनी बसची तांत्रिक तपासणी करून आरटीओकडून प्रमाणपत्र घेणे, अशा विविध उपाययोजनांची अमलबजावणी करण्याचे निर्देश देण्यात आले आहेत.