News - Daily Kesari

विदेश

स्पेस कॅप्सूल सेवा स्थगित करण्याची मस्क यांची धमकी

Samruddhi Dhayagude
07 Jun 2025

वॉशिंग्टन : अमेरिकेचे अध्यक्ष डोनाल्ड ट्रम्प यांनी उद्योजक एलन मस्क यांची रॉकेट कंपनी स्पेसएक्स आणि इंटरनेट सॅटेलाइट सेवा स्टारलिंकसाठी सरकारी करार रद्द करण्याची धमकी दिली. त्यानंतर मस्क यांनी आंतरराष्ट्रीय अंतराळ स्थानकात अंतराळवीर आणि इतर वस्तू वाहून नेण्यासाठी वापरल्या जाणार्‍या स्पेस कॅप्सूलच्या सेवा स्थगित करण्याची धमकी दिली.

स्पेसएक्स ही सध्या ड्रॅगन कॅप्सूलद्वारे अंतराळ स्थानकात आणि तेथून क्रूची वाहतूक करण्यास सक्षम असलेली एकमेव अमेरिकन कंपनी आहे. ट्रम्प आणि मस्क यांच्यातील संबंध ताणले गेल्याने ट्रम्प यांनी स्पेसएक्स आणि इंटरनेट सॅटेलाइट सेवा स्टारलिंकसाठी सरकारी करार रद्द करण्याची धमकी दिली आहे. ट्रम्प यांच्या धमकीनंतर मस्क यांनी समाजमाध्यमावर पोस्ट केली आहे. त्यामध्ये त्यांनी म्हटले आहे की, ‘स्पेसएक्स त्यांच्या ड्रॅगन अंतराळयानाच्या सेवा तात्काळ निलंबित करण्यास सुरुवात करेल.’ मस्क यांची धमकी किती प्रभावी असेल हे स्पष्ट नाही; परंतु सरकारी करारांच्या मदतीने विकसित केलेले कॅप्सूल, अंतराळ स्थानक सुरळीत चालू ठेवण्यासाठी एक महत्त्वाचा भाग आहे.अंतराळात इतर मोहिमा पाठवणे आणि अंतराळवीरांना परत आणणे यासह इतर कार्यक्रमांसाठी नासा स्पेसएक्सवर अवलंबून आहे.