News - Daily Kesari

मारुंजी परिसरातील अनधिकृत फलक बांधकामाविरोधात ’पीएमआरडीए’ची कारवाई

Wrutuja pandharpure
06 Jun 2025

पुणे : गेल्या काही दिवसापासून अनधिकृत होर्डिंग आणि बांधकामावर पुणे महानगर प्रदेश विकास प्राधिकरणाच्य माध्यमांतून धडक कारवाई करण्यात येत आहे. गुरुवारी मारुंजी सर्व्हे नं. ४५/१/२ मधील अनधिकृतरित्या उभारण्यात आलेल्या मोठ्या इमारतीवर कारवाई करून ती जमीनदोस्त करण्यात आली.

पीएमआरडीए हद्दीत अनधिकृत बांधकामे सुरू असल्याच्या तक्रारी पुढे येत आहेत. याची दखल घेत अशा बांधकामावर भेट कारवाई सुरू आहे. त्यानुसार मारुंजी परिसरातील अनधिकृत असलेल्या सर्व्हे नंबर ४५/१/२ वरील सहा मजली इमारतीवर कारवाई करून ती जमीनदोस्त करण्यात आली.

पीएमआरडीएने केलेल्या सर्वेक्षणात ९६७ अनधिकृत फलक आढळून आले आहेत. गत काही दिवसात १२२ फलक अनधिकृत बांधकाम व निर्मूलन विभागाच्या पथकामार्फत काढण्यात आले. रहदारीस अडथळा तसेच लोकांच्या जीविताला धोका निर्माण होईल, अशा हवेली, भोर, मुळशी, पुरंदर, दौंड आदि भागाताील अनधिकृत होर्डिंग धडक कारवाई करण्यात येत आहे.

महानगर आयुक्त डॉ. योगेश म्हसे यांनी दिलेल्या निर्देशानुसार सबंधित कारवाई करण्यात येत आहे. ही कारवाई प्रभारी महानगर आयुक्त दिपक सिंगल, पोलिस अधीक्षक तथा दक्षता अधिकारी अमोल तांबे, उपजिल्हाधिकारी दिप्ती सुर्यवंशी पाटील, प्रमोद कुदळे यांच्या मार्गदर्शनाखाली कारवाई करण्यात आली. कारवाईच्या वेळी प्राधिकरणाचे तहसीलदार रविंद्र रांजणे, सचिन म्हस्के, पोलिस निरीक्षक महेश कुमार सरतापे यांच्यासह स्थानिक पोलिस बंदोबस्त तैनात करण्यात आला होता.