News - Daily Kesari

देश

मेधा पाटकर यांना ओडिशातील रायगडामध्ये जाण्यापासून रोखले

Samruddhi Dhayagude
06 Jun 2025

भुवनेश्वर : बॉक्साईट खाणकामाच्या विरोधात निदर्शने सुरू असताना गुरुवारी सकाळी सामाजिक कार्यकर्त्या मेधा पाटकर यांना ओडिशाच्या रायगडा जिल्ह्यात प्रवेश करण्यापासून रोखण्यात आले.पाटकर गुरूवारी सकाळी रायगड रेल्वे स्थानकावर पोहोचताच त्यांना दोन महिन्यांसाठी जिल्ह्यात प्रवेश करण्यास बंदी घालण्याचा आदेश जिल्हा दंडाधिकारी पारुल पटवारी यांनी दिला. ’नर्मदा वाचवा’ चळवळीच्या नेत्यांसह २० ते २२ कार्यकर्त्यांवर ही बंदी घालण्यात आली आहे.

पारुल पटवारी यांनी आदेशात म्हटले आहे की, रायगडा जिल्ह्यात त्यांच्या हालचाली आणि उपस्थितीमुळे कायदा आणि सुव्यवस्था बिघडू शकते, सार्वजनिक शांतता बिघडू शकते आणि जिल्ह्यातील प्रशासकीय कामकाज आणि विकास प्रक्रियेत अडथळा येऊ शकतो अशी भीती आहे.

जागतिक पर्यावरण दिनानिमित्त ’माँ माती सुरक्षा मंच’ने आयोजित केलेल्या कार्यक्रमात पाटकर आणि इतर काही कार्यकर्ते सहभागी होणार होते. रायगडा आणि कोरापुट जिल्ह्यात बॉक्साईट खाणकाम विरोधातल्या आंदोलनाचे नेतृत्व ‘माँ माती माझी सुरक्षा मंच’ करत आहे.पाटकर म्हणाल्या, मी देशाची नागरिक आहे. आम्ही विकासाच्या विरोधात नाही,आम्ही देशाच्या शाश्वत प्रगतीची मागणी करतो.

दरम्यान, रायगडामध्ये प्रवेश नाकारल्यानंतर पाटकर गंजम जिल्ह्यातील बेरहमपूरला जातील. रायगडातील आंदोलनाचे केंद्रबिंदू असलेल्या काशीपूरमध्ये सुमारे २४० पोलिस तैनात करण्यात आल्याचे अधिकार्‍यांनी सांगितले.