News - Daily Kesari

महाराष्ट्र

मंत्री संजय शिरसाट यांच्या मुलाविरुद्ध केलेले आरोप महिलेकडून मागे

Wrutuja pandharpure
28 May 2025

‘शक्तिशाली’ लोकांकडून दबाव आल्याचा विरोधकांचा आरोप

मुंबई, (प्रतिनिधी) : सामाजिक न्याय मंत्री संजय शिरसाट यांचा मुलगा सिद्धांत यांच्यावर एका महिलेने शारीरिक आणि मानसिक त्रास दिल्याचा आणि फसवणुकीचा आरोप करून नोटीस पाठवल्याने खळबळ उडाली होती. विरोधकांनी हे प्रकरण उचलून धरत शिरसाट यांच्या राजीनाम्याची मागणी केली होती. परंतु, आरोप करणार्‍या महिलेने काही तासांत घुमजाव करत सर्व आरोप मागे घेतली. हे आमच्यातील वैयक्तिक प्रकरण आहे, कोणीही त्याचे राजकारण करू नये, असे सांगत त्या महिलेने या वादावर पडदा टाकण्याचा प्रयत्न केला आहे. त्या महिलेवर राजकीय दबाव आणून माघार घ्यायला लावल्याचा आरोप करत विरोधकांनी चौकशीची मागणी केली आहे.

सामाजिक न्याय मंत्री संजय शिरसाट यांचा मुलगा सिद्धांत यांच्यावर एका विवाहित महिलेने गंभीर आरोप करून खळबळ उडवून दिली होती. सिद्धांतने लग्न करण्यासाठी दबाव आणला. आत्महत्येची धमकी दिली. डोक्याला गोळी मारण्याचे आणि हाताला ब्लेडने कापण्याचे छायाचित्र त्याने तिला पाठवले. तिला इमोशनली ब्लॅकमेल केल्याचा आरोप संबंधित महिलेचा असल्याचे तिच्या वकिलांनी प्रसार माध्यमांशी बोलताना सांगितले. सिद्धांतने महिलेला शारीरिक आणि मानसिक त्रास दिला. ती लग्नाला तयार नसताना दबाव आणून तिला पहिल्या पतीपासून घटस्फोट घ्यायला लावला. आणि महिन्याभरापूर्वी त्याने एका दुसर्‍याच मुलीबरोबर लग्न केल्याचे छायाचित्र तिला पाठवले, असे त्यांनी सांगितले. सिद्धांतविरोधात डिसेंबर २०२४ मध्ये पोलिस तक्रार करण्यात आली. परंतु, त्यावर कारवाई झालेली नाही. या तक्रारीची प्रतही आमच्याकडे आहे. मंत्रिपदाचा आणि आमदारकीचा दबाव आणून काहीही कारवाई केली नाही.

३० तारखेला महिला अत्याचार कायदा अंतर्गत गुन्हा दाखल करणार आहोत. लीगल नोटीस पाठवण्यात आली आहे, असेही त्यांनी सांगितले. यामुळे संजय शिरसाट गोत्यात आले होते. परंतु, दुपारी तक्रारदार महिलेने घुमजाव करत सगळे आरोप मागे घेतले.