News - Daily Kesari

देश

अमृतसरमधील स्फोटात संशयित खालिस्तानी ठार

Samruddhi Dhayagude
27 May 2025

चंडीगढ : पंजाबच्या अमृतसर शहरात एका मोकळ्या जागेत मंगळवारी स्फोट झाला. त्यात एक संशयित खालिस्तानवादी मंगळवारी ठार झाला.पोलिसांनी सांगितले की, मजिठा बायपास रस्त्यावर मोकळ्या जागेत काल सकाळी साडेनऊ वाजता स्फोट झाला. घटनास्थळी हत्यारासह एका संशयित खालिस्तानवाद्याचा मृत्यू झाला.. उप महानिरीक्षक (सीमाक्षेत्र) सत्येंद्र सिंग यांनी सांगितले, की ठार झालेला व्यक्तीचे बब्बर खालसा इंटरनॅशनल दहशतवादी संघटनेसोबत संबंध असावेत. घटनास्थळावरुन तो स्फोटकाचे साहित्य घेऊन जाण्यासाठी आला असताना स्फोट झाला. स्फोट झाला त्यावेळी वेळी त्याच्याच हातात स्फोटक होते. त्याची ओळख पटविण्याचे काम सुरू आहे. तो कोणत्या दहशतवादी संघटनेशी संबंधित होता ? त्याच्या खिशातील कागदपत्रांवरुन तो कोण आहे ? याचा तपास सुरू केला आहे, असे सिंग यानी सांगितले.

दरम्यान, घटनास्थळी न्यायवैद्यक प्रयोगशाळेतील कर्मचार्‍यांना अधिक तपासासाठी बोलावण्यात आले आहे. स्फोट झालेला हातबाँब होता की, शक्तीशाली स्फोटक होते ? याचा तपास केला जात आहे.

अमृतसर ग्रामीण विभागाचे ज्येष्ठ पोलिस अधीक्षक मणिंदर सिंग यांनी सांगितले की, स्फोटात ठार झालेला व्यक्ती घटनास्थळावरुन स्फोटक नेण्याचा प्रयत्न करत असताना स्फोट झाला. त्याने निष्काळजीपणे स्फोटक हाताळले असावे. स्फोटानंतर परिसरात मोठा आवाज झाला होता. त्यामुळे परिसरात घबराट पसरली होती. यानंतर पोलिसांनी घटनास्थळ निर्मनुष्य केले आहे. नागरिकांनी घाबरून जाऊ नये, प्रकरणाचा लवकरच छडा लावला जाईल, असे उप निरीक्षक सत्येंद्र सिग यांनी सांगितले.