News - Daily Kesari

अर्थ

निफ्टीने ओलांडला २५ हजारांचा टप्पा

Samruddhi Dhayagude
27 May 2025

नवी दिल्ली : भारत जगातील चौथी आर्थिक महासत्ता बनला असून अमेरिकेचे अध्यक्ष डोनाल्ड ट्रम्प यांनी आयात शुल्क वाढीचा निर्णय ९ जुलैपर्यंत पुढे ढकलला आहे. त्याचे सकारात्मक पडसाद सोमवारी मुंबई बाजारपेठेत पाहायला मिळाले. मुंबई शेअर बाजार काल ०.५६ टक्के म्हणजे ४५५.३७ अंकांनी वाढून ८२,१७६.४५ वर स्थिरावला. तर, निफ्टी ०.६० टक्क्यांनी म्हणजे १४८ अंकांनी वाढून २५,००१.१५ वर पोहोचला.

सत्रांतर्गत निर्देशांक ०.९४ टक्के म्हणजे ७७१.१६ अंकांनी वाढून ८२,४९२.२४ वर पोहोचला होता. मान्सूनचे लवकर आगमन आणि रिझर्व बँकेने आर्थिक वर्ष २०२५ साठी केंद्र सरकारला २.६९ लाख कोटींचा विक्रमी लाभांश केल्याचे सकारात्मक पडसाद काल बाजरात उमटले. महिंद्रा अँड महिंद्रा, एचसीएल टेक, टाटा मोटर्स, नेस्ले, आयटीसी, हिंदुस्तान युनिलिव्हर, लार्सन अँड टुब्रो आणि टेक महिंद्रा याचे समभाग काल सर्वाधिक वधारले. तर, ईटरनल, अल्ट्राटेक सिमेंट, पॉवर ग्रिड, टाटा स्टील आणि कोटक महिंद्रा बँकेचे समभाग पिछाडीवर होते. भारत जपानला मागे टाकून जगातील चौथी सर्वात मोठी अर्थव्यवस्था बनला असल्याचे नीती आयोगाचे मुख्य कार्यकारी अधिकारी बीव्हीआर सुब्रह्मण्यम यांनी नुकतेच जाहीर केले.