News - Daily Kesari

डॉ. जयंत नारळीकर यांना श्रद्धांजली

Wrutuja pandharpure
25 May 2025

पुणे : सावित्रीबाई फुले पुणे विद्यापीठात भारतीय खगोलशास्त्र आणि विज्ञानाच्या विश्वात अमूल्य योगदान देणारे ज्येष्ठ खगोल भौतिकशास्त्रज्ञ व लेखक प्रा. डॉ. जयंत नारळीकर यांना श्रद्धांजली अर्पण करण्यात आली. विद्यापीठाच्या संत ज्ञानेश्वर सभागृहात कुलगुरू प्रा. डॉ. सुरेश गोसावी, प्र-कुलगुरू प्रा. डॉ. पराग काळकर, विद्यापीठ सल्लागार परिषदेचे सदस्य राजेश पांडे, वित्त व लेखाधिकारी सीएमए चारुशीला गायके, परीक्षा व मूल्यमापन मंडळाचे संचालक प्रा. डॉ. प्रभाकर देसाई, अधिष्ठाता प्रा. डॉ. सुप्रिया पाटील, नवोपक्रम, नवसंशोधन व साहचर्य चे संचालक प्रा. डॉ. देविदास गोल्हार यांनी त्यांच्या प्रतिमेस पुष्पहार अर्पण करीत त्यांना आदरांजली वाहिली.

प्रख्यात खगोलशास्त्रज्ञ प्रा. डॉ. जयंत नारळीकर यांना श्रद्धांजली वाहण्यासाठी विद्यापीठात सभेचे आयोजन करण्यात आले होते. प्रा. डॉ. नारळीकर यांच्या निधनाने भारतीय विज्ञान, साहित्य आणि शिक्षण क्षेत्रातील विश्वात मोठी पोकळी निर्माण झाली आहे. त्यांनी विद्यापीठाच्या भौतिकशास्त्र विभागात बरीच वर्षे अध्यापनाचे कार्य केले. विभागाशी आणि विद्यापीठाशी त्यांचे नाते सौहार्दपूर्ण होते, अशा शब्दात प्र-कुलगुरू प्रा. डॉ. पराग काळकर यांनी श्रद्धांजली अर्पण केली. याप्रसंगी विद्यापीठाच्या विविध शैक्षणिक व प्रशासकीय विभागांचे विभागप्रमुख, शिक्षक, शिक्षकेतर सेवक आणि विद्यार्थी मोठ्या संख्येने उपस्थित होते.