ब्रेकिंग

शैक्षणिक

मुंबई शहरात साडेचार हजार मुले शाळाबाह्य

Wrutuja pandharpure
03 Jun 2025

मुंबई : मुंबई शहरात सरत्या शैक्षणिक वर्षात तब्बल ४ हजार ५५५ शाळाबाह्य मुलांची नोंद झाली आहे. या सर्व मुलांना पुन्हा शाळेत आणण्यात शिक्षकांना यश आले आहे. यामध्ये मुंबई महानगरपालिकेच्या शिक्षकांनी ४ हजार १७८ मुले तर विभागीय शिक्षण उपसंचालक कार्यालयाकडून ३७७ मुले गेल्यावर्षी शाळेत दाखल करण्यात आली.

मोफत शिक्षण कायद्यांतर्गत बालकांना मोफत सक्तीचे शिक्षण देणे बंधनकारक असतानाही शाळाबाह्य मुले निदर्शनास येतात. त्यामुळे शहरातील शाळाबाह्य मुले शोधण्यासाठी विभागीय शिक्षण उपसंचालक कार्यालय व मुंबई महानगरपालिकेतर्फे दरवर्षी शोध मोहीम राबविण्यात येते. त्यानुसार २०२४-२५ या सरत्या शैक्षणिक वर्षांतही मोहिम राबविण्यात आली. २०२४-२५ या शैक्षणिक वर्षामध्ये ६ ते १४ वयोगटातील तब्बल ४ हजार ५५५ शाळाबाह्य मुले शोधण्यात आली आणि त्यांना पुन्हा शाळेत आणण्यात आले.