News - Daily Kesari

क्रीडा

इंग्लंड दौर्‍यापूर्वी सर्फराज खानने दहा किलो वजन केले कमी

Wrutuja pandharpure
20 May 2025

नवी दिल्ली : भारतीय कसोटी क्रिकेट संघाचा फलंदाज सर्फराज खानने इंग्लंडविरुद्धच्या कसोटी मालिकेपूर्वी डाएट प्लॅनद्वारे १० किलो वजन कमी केले आहे. २०२४ मध्ये भारतासाठी पदार्पण करणार्‍या सर्फराजने विदेशात एकही कसोटी सामना खेळलेला नाही. इंग्लंड विरुद्धच्या दोन सामन्यांसाठी या फलंदाजाची इंडिया अ संघात निवड झाली आणि तो या संधीचा पुरेपूर फायदा घेण्यासाठी सज्ज होत आहे.

इंग्लंड विरुद्धच्या सामन्यांत भारतीय संघात स्थान मिळावे यासाठी सर्फराज कठोर मेहनत घेत आहे. त्याने स्वत:ची शारीरिक चपळता वाढवण्यासाठी वजन कमी केले. यासाठी त्याच्या आहारात मोठा बदल करण्यात आला. सर्फराजच्या आहारात उकडलेल्या भाज्यांचा समावेश केला आहे. तसेच हा २७ वर्षीय फलंदाज इंग्लिश खेळपट्टीवर ऑफ-स्टंपच्या बाहेर स्विंग होणार्‍या चेंडूंना तोंड देण्यासाठी जीवतोडून सराव करत आहे.

कोहलीची जागा घेण्यासाठी तयारी

कसोटी क्रिकेटमध्ये विराट कोहलीची जागा कोण घेईल हा सर्वात मोठा प्रश्न आहे. चौथ्या क्रमांकावर कोहलीची जागा घेण्यासाठी केएल राहुल आणि शुभमन गिलची नावे आघाडीवर आहेत. या शर्यतीत सर्फराज खान याचेही नाव आहे.

सर्फराजने १० किलो वजन कमी केले आहे. तो सध्या त्याच्या आहाराची खूप काळजी घेत आहे. एवढेच नाही तर इंग्लिश खेळपट्टीवर ऑफ स्टंपच्या बाहेर जाणार्‍या चेंडूंना तोंड देण्यासाठी तो कसून सराव करत आहे. अशा स्विंगवर तोडगा काढण्यावर त्याने पूर्णपणे लक्ष केंद्रित केले आहे.

इंग्लंड दौर्‍यासाठी भारतीय संघाची घोषणा लवकरच होणार आहे. या दौर्‍यात भारतीय संघ पूर्णपणे वेगळा दिसणार आहे. रोहित शर्मा आणि विराट कोहली यांनी कसोटी क्रिकेटमधून निवृत्ती घेतली आहे. टीम इंडिया इंग्लंडच्या भूमीवर नवीन कसोटी कर्णधाराच्या नेतृत्वाखाली खेळेल. कोहली आणि रोहितच्या जागी निवड समिती कोणाला संधी देते हे पाहणे देखील मनोरंजक असेल.

इंडिया-अ साठी निवड

इंग्लंड दौर्‍यासाठी निवडलेल्या भारत-अ संघात सर्फराज खानचा समावेश करण्यात आला आहे. आता त्याला मुख्य संघात स्थान मिळते की नाही हे पाहणे रंजक ठरेल. ऑस्ट्रेलिया दौर्‍यावर असलेल्या भारतीय संघाचा भाग सर्फराज होता, पण त्याला प्लेइंग ११ मध्ये खेळण्याची संधी मिळाली नाही. न्यूझीलंडविरुद्धच्या घरच्या मालिकेत त्याने शानदार शतक झळकावले होते.