News - Daily Kesari

गुन्हेगारी जगत

ससून रूग्णालयात बॉम्ब ठेवल्याचा संदेश पाठवणार्‍यास अटक

Samruddhi Dhayagude
15 May 2025

पुणे : ससून रुग्णालयात बॉम्ब ठेवण्यात आल्याचा संदेश पाठवून भितीचे वातावरण निर्माण करणार्‍यास बंडगार्डन पोलिसांनी अटक केली. अरविंद कृष्णा कोकणी (वय-२९, नागपूर चाळ, येरवडा) असे अटक करण्यात आलेल्या आरोपीचे नाव आहे. कोकणी हा ससून रुग्णालयात सुरक्षारक्षक असल्याचे प्राथमिक तपासात समोर आले आहे.

ससून रुग्णालयातील डॉक्टरांच्या मोबाईलवर रुग्णालयात बॉम्ब ठेवला असल्याचा मेसेज सोमवारी (१२ मे) आला होता. त्या मेसेजबाबत रूग्णालयाने तत्काळ पोलिसांना माहिती दिली. पोलिसांनी तत्काळ कारवाई करण्यास सुरूवात केली. पोलिसांनी बॉम्ब शोधक व नाशक पथकामार्फत (बीडीडीएस) तत्काळ रुग्णालय परिसराची तपासणी केली. मात्र, त्यामध्ये काहीही आढळून आले नाही. पोलिसांनी तो मेसेज कोठून आला आहे. याबाबत तपास केला असता, तो मेसेज रुग्णालय परिसरामधूनच आल्याचे स्पष्ट झाले.

पोलिसांन वारंवार मोबाईलवर संपर्क साधण्याचा प्रयत्न केला. मात्र, मेसेज केल्यापासून तो मोबाईल बंद असल्याचे समोर आले. पोलिसांनी दोन दिवस तपास करून अखेर बुधवारी आरोपी सुरक्षारक्षक अरविंद कृष्णा कोकणी याला ताब्यात घेतले. त्याच्याकडे चौकशी केली असता, त्याने वॉर्ड क्रमांक ७३ मधील एका महिला रुग्णाचा मोबाईल चोरून डॉक्टर आणि वैद्यकीय अधीक्षकांना धमकीचे मेसेज पाठवल्याची कबुली दिली. बंडगार्डन पोलिस याप्रकरणी अधिक तपास करत आहेत.