News - Daily Kesari

महाराष्ट्र

अंबाबाई, जोतिबा मंदिरात आता भाविकांसाठी वस्रसंहिता

Samruddhi Dhayagude
14 May 2025

कोल्हापूर : कोल्हापूरातील अंबाबाई, जोतिबा मंदिरात भाविकांसाठी आता वस्रसंहिता लागू करण्यात आला आहे. दर्शनासाठी येणार्‍या भाविकांना मंदिर परिसरात तोकडे कपडे घालून येण्यास मनाई करण्यात येणार आहे. पश्चिम महाराष्ट्र देवस्थान समितीने याबाबत प्रसिद्धीपत्रक जाहीर करत भाविकांना सूचनांचे पालन करून सहकार्य करण्याचे आवाहन केले आहे.

अंबाबाई आणि जोतिबाच्या दर्शनासाठी भाविकांची मोठी गर्दी असते. सुट्टी अन् सणासुदीच्या काळात राज्यभरातील भाविक अंबाबाई, जोतिबाच्या दर्शनासाठी येत असतात. याआधी भाविक जीन्स अन् वेगवेगळा पेहराव करून मंदिरात प्रवेश करत होते. मात्र, यापुढे तोकडे कपडे न घालता, पारंपरिक पध्दतीने कपडे परिधान करावे लागणार आहेत.

देवस्थान समितीने दिलेल्या प्रसिद्धीपत्रकात म्हटले आहे, की करवीर निवासिनी अंबाबाई/महालक्ष्मी देवस्थान तसेच केदारलिंग (जोतिबा) देवस्थान वाडी रत्नागिरी (ता. पन्हाळा) पर्व काही भाविक दर्शनासाठी येताना तोकडे कपडे परिधान करून मंदिरामध्ये प्रवेश करतात, काही मंदिरांमध्ये दर्शनासाठी भाविकांसाठी वस्रसंहिता करण्यात आलेली आहे. करवीर निवासिनी देवस्थान हे साडेतीन शक्तिपीठांपैकी एक शक्तिपीठ असून, या मंदिराचे महत्त्व फार आहे. तरी मंदिरामध्ये भाविकांनी दर्शनास तसेच धार्मिक विधीच्या अनुषंगाने येताना तोकडे कपडे न घालता, पारंपरिक पध्दतीने कपडे परिधान करावे, मंदिरामध्ये धार्मिकतेचा आदर करून व त्याचे पालन करून पुरुष व महिला भक्तांनी कपडे परिधान करावे आणि सूचनांचे पालन करून देवस्थान व्यवस्थापन समितीस सहकार्य करावे, असे आवाहन करण्यात आले आहे.