ब्रेकिंग

गुन्हेगारी जगत

जेसीबी मशीन फसवणूक प्रकरण

Wrutuja pandharpure
08 Jun 2025

लता व शशांक हगवणेंसह चार आरोपींना न्यायालयीन कोठडी

राजगुरूनगर,(वार्ताहर) : जेसीबी मशीन गैरव्यवहारप्रकरणी शशांक हगवणे व लता हगवणे या मायलेकासह तीन तोतया बँक वसुली एजंट आणि जेसीबी मशीन शशांक हगवणे याच्या ताब्यात देणारा त्याचा मित्र प्रणय साठे अशा सहा जणांवर महाळुंगे पोलीस ठाण्यात गुन्हा दाखल करण्यात आला आहे. या सर्वांना एक दिवसाच्या पोलीस कोठडीनंतर शनिवारी राजगुरूनगर न्यायालयात हजर करण्यात आले. न्यायालयाकडून या सर्वांना न्यायालयीन कोठडी सुनावण्यात आली आहे.

जेसीबी फसवणूक प्रकरणात प्रशांत येळवंडे यांनी महाळुंगे एमआयडीसी (ता. खेड) पोलीस ठाण्यात दाखल केलेल्या फिर्यादीवरून शशांक आणि लता हगवणे या मायलेकासह योगेश राजेंद्र रासकर, गणेश रमेश पोतले, वैभव मोहन पिंगळे या तीन तोतया बँक अधिकार्‍यांसह तडजोड करणारा प्रणय साठे यांच्यावर गुन्हा दाखल करण्यात आला आहे. शशांक आणि लता हगवणे व इतर चार जणांची पोलिस कोठडी संपल्यानंतर शनिवारी राजगुरूनगर न्यायालयात हजर करण्यात आले होते. सर्वांची एकत्रित सुनावणी घेण्यात आली.

यावेळी तपासी अधिकार्‍यांनी तीन दिवसांच्या वाढीव पोलिस कोठडीची मागणी केली होती, मात्र न्यायालयाने दोन्ही बाजूंचा युक्तिवाद ऐकून घेऊन न्यायायलीन कोठडी सुनावली. त्यामुळे आता हगवणे माय लेकांसह इतर चार जणांची येरवडा कारागृहात रवानगी होणार आहे.शशांक आणि लता हगवणे यांच्या जामिनासाठी प्रकिया सुरू केली असल्याची माहिती त्यांचे वकिल अ‍ॅड स्वानंद गोविंदवार यांनी दिली.