ब्रेकिंग

विदेश

अमेरिकेत १२ देशांतील नागरिकांवर बंदी

Wrutuja pandharpure
06 Jun 2025

दहशतवादासह इतर धोके लक्षात घेत ट्रम्प सरकारचे मोठे पाऊल

वॉशिंग्टन : अमेरिकेचे अध्यक्ष डोनाल्ड ट्रम्प यांनी आणखीन एक मोठा निर्णय घेतला असून, अफगाणिस्तान आणि इराणसह एकूण १२ देशांतील नागरिकांना प्रवेश करण्यास बंदी घालण्यात आली आहे. ट्रम्प यांनी अलीकडेच एका जाहीरनाम्यावर स्वाक्षरी केली होती. याअंतर्गत, दहशतवादासह इतर धोक्यांना लक्षात घेऊन हे पाऊल उचलण्यात आले आहे. अमेरिकेच्या सुरक्षेचा विचार करून हा निर्णय घेण्यात आल्याचे ट्रम्प सरकारचे मत आहे.

ट्रम्प सरकारच्या घोषणेनुसार, अफगाणिस्तान, म्यानमार, चाड, काँगो गणराज्य, इक्वेटोरियल गिनी, इरिट्रिया, हैती, इराण, लिबिया, सोमालिया, सुदान आणि येमेन या देशांच्या नागरिकांच्या अमेरिकेत प्रवेशावर पूर्णपणे बंदी घालण्यात आली आहे. याबरोबरच बुरुंडी, क्युबा, लाओस, सिएरा, लिओन, टोगो, तुर्कमेनिस्तान आणि व्हेनेझुएला येथील नागरिकांच्या प्रवेशावर अंशतः बंदी घालण्यात आली आहे.

प्रवास बंदीचाही निर्णय

ट्रम्प यांनी प्रवास बंदीचा मोठा निर्णय घेण्याची ही पहिलीच वेळ नाही. त्यांनी या आधीही २०१७ मध्ये असा निर्णय घेतला होता. त्यावेळी त्यांनी मुस्लिम देशांवर अशीच बंदी घातली होती. ट्रम्प यांच्या या निर्णयामुळे २०१७ मध्ये हजारो पर्यटक, व्यावसायिक आणि इतर नागरिकअडचणीत आले होते. त्या काळात अनेकांना परत पाठवण्यात आले. अमेरिकेत बेकायदा प्रवेश करणार्‍या नागरिकांना प्रशासनाने बाहेरचा रस्ताही दाखवला होता.

का घातली बंदी?

ट्रम्प यांनी सांगितले, की निर्बंधांची व्याप्ती ठरवताना त्यांनी परराष्ट्र धोरण, राष्ट्रीय सुरक्षा आणि दहशतवादविरोधी उद्दिष्टे विचारात घेतली आहेत. इतर देशांमधून येणारे नागरिक व्हिसाची मुदत संपल्यानंतरही अमेरिकेत बेकायदेशीरपणे राहतात. आता याचीही काळजी घेतली जाईल. हा निर्णय ९ जूनपासून लागू केला जाईल.