News - Daily Kesari

शैक्षणिक

आयटीआय प्रवेशाची पहिली गुणवत्ता यादी ३ जुलैला

Wrutuja pandharpure
15 Jun 2025

संस्था स्तरावरील प्रवेश १० जुलैपासून

पुणे : राज्यातील शासकीय आणि खासगी औद्योगिक प्रशिक्षण संस्थेतील (आयटीआय) शिल्प कारागीर प्रशिक्षण योजनेअंतर्गत प्रवेशासाठी विद्यार्थ्यांना वाढीव मुदतीसह २७ जूनपर्यंत अर्ज करता येणार आहे. आयटीआय अभ्यासक्रमाची प्राथमिक गुणवत्ता यादी ३० जून रोजी, तर अंतिम गुणवत्ता यादी ३ जुलै रोजी जाहीर होणार आहे.आयटीआय प्रवेशासाठी एकूण चार फेर्‍या राबविण्यात येत आहे. राज्यातील सर्व शासकीय आणि खासगी आयटीआयमधील प्रवेशासाठी ऑनलाइन अर्ज नोंदणीची प्रक्रिया सुरू झाली आहे. चार फेर्‍या राबविल्यानंतर संस्थास्तरीय समुपदेशन फेरी आणि खासगी आयटीआयमधील संस्था स्तरावरील प्रवेश होणार आहेत.

या प्रक्रियेतील प्राथमिक गुणवत्ता यादीबाबत हरकती नोंदविणे आणि प्रवेश अर्जातील माहितीत बदल करण्यासाठी ३० जून ते १ जुलैपर्यंत मुदत देण्यात आली आहे. पहिल्या फेरीतील निवड यादी ९ जुलैला प्रसिद्ध होणार असून, यात निवड झालेल्या विद्यार्थ्यांना प्रवेशासाठी १० ते १५ जुलैपर्यंतचा कालावधी देण्यात आला आहे. दुसरी प्रवेश फेरी १० ते २८ जुलै, तिसरी प्रवेश फेरी २३ जुलै ते ८ ऑगस्ट, चौथी प्रवेश फेरी ४ ते १९ ऑगस्ट, संस्थास्तरीय समुपदेशन फेरी २१ ते २८ ऑगस्ट, खासगी आयटीआयमधील संस्था स्तरावरील प्रवेश १० जुलैपासून होणार असल्याचे वेळापत्रकात नमूद करण्यात आले आहे.