News - Daily Kesari

महाराष्ट्र

‘छत्रपती शिवाजी महाराज सर्किट’ विशेष रेल्वे आजपासून धावणार

Samruddhi Dhayagude
09 Jun 2025

प्रवाशांचा पहिला मुक्काम रायगडावर

मुंबई : भारतीय रेल्वे खानपान व पर्यटन महामंडळाने (आयआरसीटीसी) ऐतिहासिक व सांस्कृतिक वारसाला उजाळा देण्यासाठी आणि छत्रपती शिवाजी महाराज यांच्या जीवनकार्याचा परिचय करून देण्यासाठी ‘छत्रपती शिवाजी महाराज सर्किट’ या एका विशेष रेल्वे आज (सोमवार) पासून प्रवाशांच्या सेवेत सुरू होते आहे.

‘भारत गौरव टुरिस्ट ट्रेन’ अंतर्गत आजपासून ही यात्रा सुरू होणार आहे. विशेष म्हणजे ही रेल्वे पहिल्याच दिवशी रायगड किल्ल्याला भेट देणार आहे. या रेल्वेचा एकूण पाच दिवसांचा महाराष्ट्रभर प्रवास असेल. सकाळी साडे दहा वाजता ही रेल्वे सीएसएमटी मुंबईवरून माणगाव रेल्वे स्थानकात पोहचणार आहे. त्यानंतर, प्रवाशांना येथील रायगड किल्ल्यावर जाऊन किल्ले रायगड पाहता येईल.

किल्ले रायगडावर नुकताच शिवराज्याभिषेक सोहळा संपन्न झाला. महाराष्ट्राच्या कानाकोपर्‍यातून शिवभक्त येथे अभिवादन करण्यासाठी जमले होते. किल्ले रायगडवर पर्यटनासाठी व शिवरायांचा जाज्वल्य इतिहास जाणून घेण्यासाठीही दरवर्षी हजारो पर्यटक भेट देतात. आता, रेल्वे विभागाने शिवाजी महाराजांच्या नावानेच एक विशेष पर्यटन गाडी सुरू केली आहे. रायगड, प्रतापगड, लाल महाल, कोल्हापूर, पन्हाळा अशा ऐतिहासिक ठिकाणांना ही ट्रेन भेट देणार असून आजपासूनच या रेल्वे गाडीचा शुभारंभ होत आहे.

रेल्वेचा प्रवास पुढीलप्रमाणे :

शुभारंभ ९ जून

कालावधी : ५ दिवसांची यात्रा (सकाळी समाप्ती)

प्रारंभ व समाप्ती स्थान: छत्रपती शिवाजी महाराज टर्मिनस मुंबई

प्रवास सुरु व संपण्याचे स्थानक : दादर, ठाणे

प्रवासमार्ग पुढीलप्रमाणे :

मुंबई(सीएसएमटी)-रायगड-पुणे-शिवनेरी-भीमाशंकर-प्रतापगड-कोल्हापूर-पन्हाळा- मुंबई. म्हणजे, मुंबई, पुणे, सातारा आणि कोल्हापूर या ४ जिल्ह्यातून ही ट्रेन ऐतिहासिक पर्यटन घडवणार आहे.