News - Daily Kesari

गुन्हेगारी जगत

निलेश चव्हाणला पकडल्याचा फोन करणार्‍यावर गुन्हा

Wrutuja pandharpure
30 May 2025

पुणे : पिंपरी-चिंचवड येथील वैष्णवी हगवणे आत्महत्या प्रकरणात फरार असलेला आरोपी निलेश चव्हाण (वारजे) याला आम्ही पकडले असून त्याच्याकडे २ पिस्तूल आहेत. मिळाली. त्याला मारहाण करुन गाडीच्या डिकीत कोंबल आहे, असा पोलीस नियंत्रण कक्षाला फोन येताच पोलिसांची धावपळ उडाली. प्रत्यक्षात माहिती दिली तर पैसे मिळतील, या आशेने त्याने फोन केला होता. मात्र, पोलिसांना खोटी माहिती देऊन त्यांची दिशाभूल केल्याबद्दल नांदेड सिटी पोलिसांनी या तरुणावर गुन्हा दाखल केला आहे.

संतोष गायकवाड (वय ३२, नांदेड गाव) असे गुन्हा दाखल झालेल्या तरुणाचे नाव आहे. हा प्रकार बुधवारी सायंकाळी सहाच्या सुमारास घडला. वैष्णवी हगवणे आत्महत्या प्रकरणात वारजे येथील सराईत गुंड निलेश चव्हाण याला आरोपी करण्यात आले आहे. वैष्णवी हगवणे हिचे ९ महिन्याचे बाळ त्याच्याकडे होते. वैष्णवीचे आईवडिल हे बाळ आणण्यासाठी त्याच्याकडे गेले असताना त्याने त्यांना पिस्तुलाचा धाक दाखवून हाकलून लावले होते. त्यावरुन वारजे माळवाडी पोलीस ठाण्यात गुन्हा दाखल केला. तेव्हापासून तो फरार आहे.

दरम्यान, फरार निलेश चव्हाणला पकडले आहे. त्याच्याकडे २ पिस्तूल मिळाली. त्याला मारहाण करुन गाडीच्या डिकीत ठेवले आहे, अशी माहिती पोलीस नियंत्रण कक्षाला बुधवारी सायंकाळी पाचच्या सुमारास फोनवरून मिळाली. पोलिसांनी सध्या तु कोठे आहे असे विचारल्यावर त्याने किरकटवाडी येथे असल्याचे सांगितले. त्याबरोबर नांदेड सिटी पोलीस ठाण्याचे पथक तेथे गेले. त्यांनी संतोष गायकवाड याच्याकडे चौकशी केली. तेव्हा त्याने अगोदर पैशांची मागणी केली. पैसे दिले की त्याची माहिती देतो, असे तो सांगत होता. तेव्हा संशय आल्याने त्याला पोलीस ठाण्यात आणले. त्याच्याकडे चौकशी केल्यावर त्याने कोणालाही पकडले नाही. तर, माहिती दिली म्हणून पोलीस पैसे देतील, असे वाटल्याने फोन केल्याचे सांगितले.