ब्रेकिंग

विदेश

हॉवर्ड विद्यापीठ आणि ट्रम्प सरकार यांच्यातील तणावामुळे विद्यार्थी संभ्रमात

Samruddhi Dhayagude
11 Jun 2025

वॉशिंग्टन : अमेरिकेतील ट्रम्प सरकार आणि हॉवर्ड विद्यापीठामध्ये सुरू असलेल्या तणावाच्या पार्श्वभूमीवर, तेथे शिकत असलेल्या भारतीय विद्यार्थ्यांमध्ये चिंतेचे वातावरण निर्माण झाले आहे. याचबरोबर, नोकरीच्या संधीच्या कमी झाल्याने करिअरविषयी अनिश्चितताही निर्माण झाल्याचे येथील भारतीय विद्यार्थ्यांचे म्हणणे आहे.गेल्या काही दिवसांत ट्रम्प प्रशासन आणि हॉवर्ड विद्यापीठ यांच्यात घडलेल्या घटनांच्या पार्श्वभूमीवर, नाव न सांगण्याच्या अटीवर, हॉवर्ड केनेडी स्कूलमधून पदवीधर झालेला एक भारतीय विद्यार्थी म्हणाला, आम्ही काय करावे, आम्ही घरी परतावे की येथेच काहीतरी करण्याचा प्रयत्न करावा, हे समजेनासे झाले आहे.

हॉवर्ड ग्रॅज्युएट स्कूल ऑफ डिझाइनमधून दोन वर्षांचा अभ्यासक्रम पूर्ण करून पदवीधर झालेल्या एका भारतीय विद्यार्थिनीने सांगितले, की विद्यार्थी अमेरिकन संस्थांमध्ये त्यांचे शिक्षण पूर्ण करण्याच्या आणि नंतर काही वर्षे अमेरिकेत नोकरी करण्याच्या उद्देशाने येतात. मात्र, या सर्व अनिश्चिततेच्या वातावरणामुळे, नोकरी देताना बर्‍याच कंपन्या आंतरराष्ट्रीय विद्यार्थ्यांना कामावर घेताना संकोच करत आहेत.

कदाचित हॉवर्ड विद्यापीठातून शिक्षण घेतल्यामुळे काहींना नोकरी मिळण्यासाठी मदत व्हायची; परंतु सध्या पूर्वीसारखी परिस्थिती राहिलेली नाही. अमेरिकेतील गेल्या काही महिन्यांतील परिस्थिती रोलरकोस्टर अशीच झाली आहे. अमेरिकेतच राहायचे, की भारतात परतायचे, यावर बोलताना ही विद्यार्थिनी म्हणाली, मला माहीत नाही, की मी भारतात परत जाईन, इथेच राहीन, का एखाद्या दुसर्‍या देशात जाईन.