News - Daily Kesari

गुन्हेगारी जगत

कोल्हापुरात पंचगंगेच्या घाटावर महिलेच्या अंगातून भूत काढण्याचा प्रकार

Samruddhi Dhayagude
11 Jun 2025

कोल्हापूर : महिलेला भूतबाधा झाली असल्याचे सांगत पंचगंगा नदीच्या घाटावर विधी करीत भूतबाधा काढण्याचा प्रकार सोमवारी मध्यरात्री सुरू होता. याची चित्रफित समाज माध्यमावर प्रसारित झाली आहे. दरम्यान, अंधश्रद्धा पसरवणारे भोंदू बाबा आणि मांत्रिकावर पोलिसांनी कारवाई करावी, अशी मागणी अंधश्रद्धा निर्मूलन समितीने केली आहे.

दरम्यान, पुरोगामी म्हणवणार्‍या कोल्हापुरात अंधश्रद्धेला खतपाणी घालण्याचे प्रकार वाढत असल्याबद्दल विविध क्षेत्रातून प्रतिक्रिया उमटत आहेत. एरवी रात्रीच्या जेवणानंतर पाय मोकळे करण्यासाठी पंचगंगा नदी घाटावर फेरफटका मारणार्‍या पेठेतील कोल्हापूरकरांना रस्सा मंडळे, जेवणावळ्या नेहमीच्या असतात. परवा रात्री मात्र नदी घाटावर वेगळाच प्रकार पाहायला मिळाला. बाहेरगावातून आलेले काहीतरी विधी करीत होते. यात दोन महिलांचाही समावेश होता. अचानक एका महिलेच्या अंगात येते आणि विचित्र हास्य करीत ती घुमू लागते. तर, समोर बसलेला मांत्रिक काही विधी करून भूतबाधा काढण्याचा प्रयत्न करत होता. सुमारे तासभर हा प्रकार सुरू होता. याबाबत काही तरुणांनी विचारणा केली असता भूतबाधा काढली जात असल्याचे त्यांना सांगण्यात आले.