पुणे : महाराष्ट्र क्रिकेट संघटनेच्या वतीने आयोजित अदानी महाराष्ट्र प्रीमियर लीग(एमपीएल) 2025 स्पर्धेत दुसर्‍या दिवशी कर्णधार ऋषभ राठोड(80धावा) याने केलेल्या महत्वपूर्ण खेळीच्या जोरावर रायगड रॉयल्स संघाने सातारा वॉरियर्स संघावर 24 धावांनी विजय मिळवला. 

 

गहुंजे येथील महाराष्ट्र क्रिकेट संघटनेच्या मैदानावर सुरु झालेल्या या स्पर्धेत सातारा वॉरियर्स संघाने नाणेफेक जिंकून प्रथम क्षेत्ररक्षण करण्याचा निर्णय घेतला. रायगड रॉयल्स संघाने पहिल्यांदा खेळताना 20षटकात 6बाद 190धावांचे आव्हान उभे केले. वरच्या फळीतील फलंदाज सिद्धेश वीर(0) खाते न उघडताच तंबूत परतला. त्याला वैभव दारकुंडेने झेल बाद केले. पाठोपाठ हर्ष मोगवीरा(5)ला सातारा वॉरियर्सच्या राजवर्धन हंगरगेकरने झेल बाद करून रायगड रॉयल्स संघाला 2 बाद 13 असे अडचणीत  टाकले. यातून रायगड रॉयल्स  सावरत असतानाच जगदीश झोपेने दिग्विजय पाटील(13)याला, तर राजवर्धन हंगरगेकरने हर्ष संघवी(18)याला बाद करून रायगड रॉयल्सची अडचण आणखी वाढवली. सहाव्या क्रमांकास फलंदाजीस उतरलेल्या ऋषभ राठोडने 45 चेंडूत 80धावांची आक्रमक खेळी करत संघाचा धावफलक पुढे नेला. यात त्याने 6 चौकार व 5 उत्तुंग षटकार मारले. त्याला ऋग्वेद मोरेने 41 चेंडूत 3 चौकार व 2 षटकाराच्या मदतीने 48 धावा काढून साथ दिली. या जोडीने पाचव्या विकेटसाठी 83 चेंडूत 130 धावांची भागीदारी करून संघाला समाधानकारक धावसंख्या उभारून दिली. सातारा वॉरियर्सकडून राजवर्धन हंगरगेकरने 42 धावात 3 गडी, वैभव दरकुंडेने 33 धावात 2 गडी बाद केले.