बनावट दिव्यांग प्रमाणपत्र देणार्‍या डॉक्टरांवर कारवाई   

उदय सामंत यांचे विधानसभेत आश्वासन

मुंबई, (प्रतिनिधी) : जिल्हा परिषदांमध्ये भरती प्रक्रियेत बनावट दिव्यांग प्रमाणपत्रासंदर्भात मुख्य कार्यकारी अधिकार्‍यांना फेरपडताळणी  करण्याचे आदेश दिले जातील. तसेच, मुंबई महापालिका आयुक्तांकडून बनावट दिव्यांग प्रमाणपत्राबाबत आढावा घेतला जाईल. बनावट प्रमाणपत्रास मान्यता देणार्‍या वैद्यकीय अधिकार्‍यांवर कारवाई करण्यात येईल, असे  आश्वासन मंत्री उदय सामंत यांनी सोमवारी विधानसभेत प्रश्नोत्तराच्या तासात दिले.
 
महापालिका, जिल्हा परिषदेच्या शाळेत बनावट दिव्यांग दाखल्याच्या आधारे शिक्षक आणि शिक्षकेतर कर्मचार्‍यांची भरती करण्यात आल्याबद्दल राष्ट्रवादी काँग्रेस अजित पवार गटाच्या सरोज अहिरे यांनी प्रश्न  विचारला होता. 
 
या प्रश्नाला उत्तर देताना  सामंत म्हणाले, मुंबई  महानगर पालिकेअंतर्गत ११ दिव्यांग उमेदवारांची नायर रुग्णालयात  फेरपडताळणी करण्यात आली. यामध्ये दोन उमेदवारांचे दिव्यांगत्व प्रमाण ४० टक्क्यांपेक्षा कमी असल्याचे आढळून आले. त्यामुळे त्यांना अपात्र ठरवून नियुक्ती आदेश देण्यात आले नाहीत. नाशिक महानगरपालिकेत भरती करण्यात आलेल्या हिंदी आणि उर्दू माध्यमातील दोन शिक्षकांकडे मात्र वैध दिव्यांग युनिक आयडी उपलब्ध असल्याचे स्पष्ट झाले आहे.
 
राज्यातील सर्व स्थानिक स्वराज्य संस्थांमध्ये शिक्षक भरती ही ‘पवित्र पोर्टल’च्या माध्यमातून अभियोग्यता चाचणीतील गुणांच्या आधारे पारदर्शक पद्धतीने राबवली जाते. उमेदवारांची प्रवर्गानुसार कागदपत्र पडताळणी संबंधित नियुक्ती प्राधिकार्‍यांमार्फत केली जाते. प्रमाणपत्र बनावट असल्याचे आढळल्यास उमेदवारास तत्काळ अपात्र ठरवले जात असल्याचेही उदय  सामंत यांनी सांगितले. यावेळी आमदार नाना पटोले, वरूण सरदेसाई यांनी उपप्रश्न विचारले.
 

Related Articles