फरारी आरोपीला अटक   

पुणे : गस्तीवर असलेल्या पोलिसांवर प्रभात रस्त्यावरील बंद बंगल्यामध्ये दरोडा टाकण्यासाठी शिरलेल्या दरोडेखोरांनी हल्ला केला होता. त्यावेळी, पोलिसांनी गोळीबार केला. त्यातील, फरारी गुन्हेगारांपैकी एकाला गुन्हे शाखेच्या युनिट सहाच्या पथकाने नाशिक येथून आठ महिन्यांनी अटक केली.
 
फिरोजखां शरीफखां दुल्होत ऊर्फ मेवाती (वय ३४, झंजाळा, अंबई, ता. सिल्लोड, छत्रपती संभाजीनगर) असे नाशिक येथून अटक केलेल्या गुन्हेगाराचे नाव आहे. पोलीस अंमलदार महेश तांबे यांनी याप्रकरणी डेक्कन पोलीस ठाण्यात तक्रार दिली होती. प्रभात रस्त्यावर २२  ऑक्टोंबर २०२४ रोजी पहाटे अडीचच्या सुमारास हा प्रकार घडला होता.
 
तक्रारदार महेश तांबे आणि त्यांचे सहकारी गणेश सातव यांच्यासह रात्रपाळीवर असताना गस्त घालत होते. गस्त घालत असताना, पहाटे अडीचच्या सुमारास प्रभात रोडवरील अभिनव विद्यालय पथ येथील जानकी व्हिला बंगल्यासमोर आले. तेव्हा तेथे दुचाकीवर दोघे जण थांबलेले दिसले. त्यांनी या दोघांकडे चौकशी केल्यावर त्यांनी बंद बंगल्याकडे पाहत आवाज दिला. त्याबरोबर सहा ते सात जण बाहेर आले. त्यांनी या दोघा पोलिसांवर हल्ला केला. तेव्हा तांबे यांनी आपल्याकडील पिस्तुलातून दोन गोळ्या झाडल्या. त्या दोघांच्या पायाला लागल्या होत्या. गोळीबार झाल्यावर ते पळून गेले होते. त्यातील एकाला गुन्हे शाखेने या अगोदर पकडले होते. इतर पाच गुन्हेगारांना न्यायालयाने फरार घोषित केले होते.
 
पोलीस अंमलदारांवर हल्ला करणारा मुख्य गुन्हेगार फिरोजखां दुल्होत हा नाशिक येथे येणार असल्याची माहिती पथकाचे पोलीस निरीक्षक वाहीद पठाण यांना खबर्‍याकडून मिळाली. त्यावरून, पोलिसांचे पथक तातडीने नाशिकला रवाना झाले. या पथकाने भद्रकाली येथील कान्हेरेवाडीमधील बी.डी. भालेकर मैदानात सापळा रचून त्याला ताब्यात घेतले. त्याच्याविरुद्ध अनेक गुन्हे दाखल आहेत. पुढील कारवाईसाठी त्याला डेक्कन पोलीस ठाण्याच्या ताब्यात देण्यात आले.
पोलीस निरीक्षक वाहीद पठाण, सहायक निरीक्षक राकेश कदम, मदन कांबळे, बाळासाहेब सकटे, नितीन मुंढे, सारंग दळे, कानिफनाथ कारखेले, प्रशांत कापुरे, गिरीष नाणेकर, सुहास तांबेकर, ऋषिकेश ताकवणे, सचिन पवार, ऋषिकेश व्यवहारे, शेखर काटे, नितीन घाडगे, बाळासाहेब तनपुरे, पानसरे, नेहा तापकीर, मांदळे, नरवडे यांच्या पथकाने ही कारवाई केली.
 

Related Articles