निरा बंधार्‍यावरून १५ वर्षांचा मुलगा पाण्यात वाहून गेला   

सराटी येथील निरा नदीच्या बंधार्‍यावरील घटना

इंदापूर, (वार्ताहर) : जगद‍्गुरू संत श्री तुकोबारायांच्या निरा स्नानापूर्वी निरा नदीकाठी एक दुर्घटना घडली. इंदापूर तालुक्यातील सराटी आणि अकलूजला जोडणार्‍या निरा नदीवरील बंधार्‍यातून मंगळवारी सकाळी सव्वासहाच्या सुमारास वारीत सहभागी असलेला गोविंद कल्याण फोके हा 15 वर्षीय मुलगा अंघोळीला नदीत गेल्यानंतर पाण्यात वाहून गेला. तो जालना जिल्ह्यातील अंबड तालुक्यातील झिरपी गावचा रहिवासी आहे. तो आजी परेगा प्रभाकर खराबे यांच्यासोबत संत तुकोबांच्या वारीत चालत होता. त्याचा शोध अद्याप सुरूच आहे.
 
दरम्यान, गोविंद वाहून जात असल्याचे दिसताच निरा नदीवर कर्तव्यावर असणारे बारामती तालुक्यातील मोरगाव येथील होमगार्ड कर्मचारी राहुल अशोक ठोंबरे यांनी महिलेचा ओरडण्याचा आवाज आल्यानंतर क्षणाचाही विलंब न करता नदीमध्ये उडी टाकली. दोनवेळा त्याला हाताला धरून पाण्याबाहेर काढण्याचा प्रयत्न केला. मात्र, पाण्याच्या अतिवेगामुळे तो प्रयत्न निष्फळ ठरला. होमगार्ड ठोंबरे एका बाजूला पाण्यातून फेकले गेले, तर तो मुलगा पाण्याच्या वेगात पुढे वाहून गेला. याबाबत पोलिस उपनिरीक्षक अभिजित कणसे म्हणाले, नदीमध्ये अंघोळीला गेलेला हा मुलगा वाहून गेला असून, त्याला शोधण्यासाठी स्थानिक व एनडीआरएफचे जवान पोलिस शोधकार्य करीत आहेत.

आजीचा एकच आक्रोश 

अंघोळीला आम्ही बरोबरच नदीकाठी आल्यानंतर तो पाण्यात गेला आणि पाण्याच्या वेगाच्या भोवर्‍यात अडकला. मी आरडाओरडा केला, त्या वेळी काहींनी नदीमध्ये उड्या टाकल्या तर काहींनी शोध घेतला. मात्र, तो अद्याप आढळून आला नाही, असे सांगताना आजीला गहिवरून आले होते. या वेळी आजीने केलेला आक्रोश हृदय पिळवटून टाकणारा होता.
 

Related Articles