ब्रेकिंग

माल वाहतूकदार आंदोलनावर ठाम

Wrutuja pandharpure
02 Jul 2025

पुणे : वाहतूक पोलिसांकडून माल वाहतूक करणार्‍या गाड्यांवर कारवाई करण्यात येत असल्याच्या निषेधार्थ माल वाहतूकदारांनी मंगळवारी मध्यरात्रीपासून वाहतूक बंद आंदोलन सुरू केले आहे. जोपर्यंत मागण्या पूर्ण होणार नाहीत, तोपर्यंत आंदोलन मागे घेणार नसल्याची भूमिका माल वाहतूकदारांनी स्पष्ट केली आहे. त्यामुळे आज (बुधवारी) पुणेकरांची गैरसोय होण्याची शक्यता आहे.

अन्नधान्य, दूध, भाजीपाला, फुले तसेच औषधांची वाहतूक करणार्‍या गाड्यांचा आंदोलनात सहभाग असणार आहे. वाहतूक पोलिसांकडून जबरदस्तीने होणारी दंड वसूली तात्काळ बंद करावी. याआधी आकारण्यात आलेले दंड माफ करावे, क्लिनरची सक्ती रद्द करण्यात यावी, व्यावसरयिक वाहनांना प्रवेश बंदी बाबत व वेळेच्या बाबतीत विचार करावा. ई-चलन बाबतच्या तक्रारीकडे लक्ष द्यावे. आदी मागण्या दि पूना डिस्ट्रिक्ट मोटार गुडस् ट्रान्सपोर्ट असोसिएशन व महाराष्ट्र राज्य वाहन चालक-मालक व प्रतिनिधी महासंघातर्फे करण्यात आल्या आहेत.

महाराष्ट्र राज्य वाहन चालक मालक व प्रतिनिधी महासंघाचे अध्यक्ष डॉ. बाबा शिंदे म्हणाले, शहराच्या मध्यभागात असलेल्या नाना पेठ, भवानी पेठ, गणेश पेठेतील भुसार बाजार, तसेच मार्केटयार्डातील भुसार बाजारात अन्नधान्य वाहतूक करणार्‍या माल मोटारी, टेम्पो माल वाहतूकीवर वाहतूक पोलिसांनी कारवाई केली आहे. शहरातील विविध रस्त्यांवर जड वाहनांवर वाहतूक पोलिसांनी बंदी घातली आहे. जीवनावश्यक वस्तुंची वाहतूक करणार्‍या गाड्यांवर कारवाई केली जात आहे. त्यामुळे अन्नधान्य, दूध, भाजीपाला, फुले तसेच औषधांची वाहतूक करणारी वाहने आंदोलनात सहभागी होणार आहेत.