ब्रेकिंग

गुन्हेगारी जगत

परीक्षेत डमी उमेदवार; सात जणांवर गुन्हा

Wrutuja pandharpure
02 Jul 2025

नाशिक : नाशिक येथील करन्सी नोट प्रेसमध्ये झालेल्या भरती प्रक्रियेत धक्कादायक प्रकार उघडकीस आला आहे. यासाठी घेण्यात आलेल्या परीक्षेत काही उमेदवारांनी फसवणूक करून, डमी परीक्षार्थी बसवून आणि बनावट कागदपत्रांच्या आधारे नोकरी मिळविल्याचे समोर आले आहे. याप्रकरणी पवई पोलीस ठाण्यात सात जणांविरोधात गुन्हा दाखल करण्यात आला असून, हे सर्व आरोपी मूळचे बिहारमधील रहिवासी आहेत.

बनावट कागदपत्रांचा वापर

परीक्षा पास झाल्यानंतर, आरोपींनी बनावट आयटीआय प्रमाणपत्रे आणि विद्युत अभियांत्रिकीतील (इलेक्ट्रिकल) डिप्लोमाची बनावट कागदपत्रे सादर करत नोकरी मिळवली. हा फसवणुकीचा प्रकार उघडकीस आल्यानंतर हे प्रकरण झिरो एफआयआरच्या स्वरूपात मुंबईतील पवई पोलिस ठाण्यात वर्ग करण्यात आले.

या प्रकरणात गुन्हा दाखल करण्यात आलेल्या सात जणांची नावे पुढीलप्रमाणे : रवी रंजन कुमार, संदीप कुमार, शिशुपाल कुमार, आयुष राज, राजीव सिंग, संदीप कुमार (दुसरा आरोपी), आशुतोष कुमार या सर्व आरोपींचा शोध सुरू असून, पोलिस विविध राज्यांत शोधमोहीम राबवत आहेत. पवई पोलिसांनी या प्रकरणात फसवणूक, बनावट कागदपत्र तयार करणे आणि त्याचा वापर करणे अशा विविध गंभीर कलमा अंतर्गत गुन्हा दाखल केला आहे. या प्रकरणाच्या मुळाशी जाऊन या टोळीचा छडा लावण्याचा प्रयत्न पोलिसांकडून सुरु आहे.