हिंदी सक्ती अध्यादेशाची होळी   

मुंबई : हिंदी सक्तीच्या निर्णयाविरोधात रविवारी सर्व विरोधी पक्ष एकवटले. शिवसेना उद्धव बाळासाहेब ठाकरे पक्षाने राज्यभर आंदोलन सुरु केले. काल मुंबई मराठी पत्रकार संघ कार्यालय परिसरात उद्धव ठाकरे यांच्या उपस्थितीत अध्यादेशाची प्रतिकात्मक होळी करण्यात आली. काँग्रेसचे प्रदेशाध्यक्ष हर्षवर्धन सपकाळ यांच्यासह अन्य विरोधी पक्षही सहभागी झाले.  काही मराठी कलाकारांनीही आंदोलनात भाग घेतला.
 
राज्य सरकारने राष्ट्रीय शिक्षण धोरणाअंतर्गत बदल करून इयत्ता पहिली ते पाचवीच्या विद्यार्थ्यांना हिंदीचा विषय सक्तीचा करण्याचा निर्णय घेतला आहे. त्याविरोधात विरोधात मनसे आणि शिवसेना ठाकरे गटाने मुंबईत पाच जुलै रोजी मोर्चा काढण्याचे ठरवले आहे. यापूर्वी तालुकास्तरावर हिंदी सक्तीच्या अध्यादेशाची (जीआरची) होळी करुन निषेध व्यक्त करण्यात आला. 
 
हिंदीच्या मुद्द्यावर मराठी अभ्यास केंद्र आणि समविचारी संस्थाची मुंबईत बैठक पार पडली. त्यानंतर अध्यादेशाची होळी करण्याचा निर्णय घेण्यात आला. त्यामध्ये ठाकरे गटाचे शिवसैनिक, तसेच महाविकास आघाडीचे नेते आणि कार्यकर्ते मोठ्या संख्येने उपस्थित होते. 
 
दादर परिसरात फलकबाजी
 
ठाकरेंच्या शिवसेनेकडून दादरच्या शिवसेना भवन परिसरात फलक लावण्यात आले आहेत. ’हिंदी सक्तीच्या सरकारच्या निर्णयाची होळी करूया, मराठी माणसाच्या एकजुटीची ताकद दाखवूया’ असा मजकूर फलकावर लिहिला आहे.
 
संजय राऊत म्हणाले की, मुंबईतील आंदोलनासाठी सगळ्यांना निमंत्रण दिले होते. सरकारच्या निर्णयाची होळी करणे हा पहिला टप्पा होता. देवेंद्र फडणवीस, अजित पवार, एकनाथ शिंदे यांच्या सरकारने  काढलेल्या हिंदी सक्तीचया आदेशाची होळी केली.केवळ शिवसैनिक नाही तर त्या त्या जिल्ह्यातील मराठी जनता, साहित्यिक, लेखक यांनाही आमंत्रित केले आहे. अधिवेशनातही हा विषय मांडला जाणार आहे. 
 
मनसेकडून बैठकांचे सत्र
 
मनसेने  ५ जुलैच्या मोर्चाच्या पार्श्वभूमीवर बैठकांचे सत्र सुरू केले आहे.  मोर्चाच्या नियोजनाची बैठक मुंबईतील दादरमधील राजगड कार्यालयात  पार पडली. यावेळी मनसेचे मुंबई शहराध्यक्ष संदीप देशपांडे, नितीन सरदेसाई, यशवंत किल्लेदार उपस्थित होते. तर यानंतर दक्षिण मुंबई पदाधिकार्‍यांची बैठकही मुंबई मराठी पत्रकार संघात होणार आहे, मनसेचे नेते बाळा नांदगावकर यांच्या अध्यक्षतेखाली बैठक आयोजित केली.

Related Articles