ब्रेकिंग

मनोरंजन

ज्येष्ठ गायक आणि वादक इकबाल दरबार यांचे निधन

Samruddhi Dhayagude
28 Jun 2025

पुणे : पुण्यातील प्रसिद्ध 'दरबार बँड'चे सर्वेसर्वा, महंमद रफी यांचे प्रेमी आणि प्रसिद्ध सेक्सोफोन वादक इक्बाल दरबार यांचे निधन झाले आहे. ते ७७ वर्षांचे होते. त्यांच्या मागे तीन मुले, एक मुलगी आणि नातवंडे असा परिवार आहे. ऑर्केस्ट्रा ही संकल्पना महाराष्ट्रात रुजवणाऱ्या काही मोजक्या कलावंतांमध्ये दरबार यांचे नाव अभिमानाने घेतले जाते. त्यांच्या वादनाचे चाहते केवळ पुणे-मुंबईपुरते मर्यादित नव्हते तर बॉलिवूडमधील बरेच दिग्गज कलाकारही त्यांच्या वादनाने भारावून जात असत. त्यांच्या निधनाने मनोरंजन सृष्टीवर शोककळा पसरली.

इकबाल दरबार यांचे कार्य केवळ संगीतपुरते मर्यादित नव्हते. सामाजिक सलोखा, बंधुभाव आणि सेवाभाव ही त्यांच्या कार्यशैलीची खास वैशिष्ट्ये होती. दरवर्षी पुण्याच्या दगडूशेठ हलवाई गणपती विसर्जन मिरवणुकीची सुरुवात त्यांच्या दरबार बँडद्वारे सादर केलेल्या आरतीनेच होत असे. हे केवळ परंपरेचे नव्हे, तर समाजाशी असलेल्या त्यांच्या नात्याचे प्रतीक होते. त्यांनी सीमेवर जाऊन आपल्या वादनाने भारतीय जवानांचे मनोरंजन केले आणि त्या कार्यक्रमातून मिळालेला निधी कृतज्ञता निधी म्हणून सैन्याला दिला. तसेच 'भोई फाउंडेशनच्या' 'पुण्याजागर' उपक्रमासाठीही त्यांनी कृतज्ञता निधी दिला होता. त्यांनी स्थापन केलेल्या 'मोहम्मद रफी आर्ट फाउंडेशन'च्या माध्यमातून गरजू कलाकारांना वैद्यकीय आणि आर्थिक सहाय्य मिळावे यासाठी ते झटत होते. बँडमधील कलाकार व्यसनमुक्त व्हावेत यासाठीही त्यांनी विशेष प्रयत्न केले. त्यांचे योगदान हे केवळ संगीताच्या क्षेत्रापुरते मर्यादित नव्हते, ते एका सामाजिक कलाकाराचे, एका देशभक्ताचे आणि एका संवेदनशील माणसाचे होते.