भावनेचा अतिरेक टाळा

 

शुक्र-नेपच्यून युती आणि रवी-बुध युती या योगांच्या पार्श्वभूमीवर होणारी सप्ताहाच्या शेवटी होणारी मराठी वर्षातील शेवटची अमावस्या ही वैशिष्ट्यपूर्ण ठरेल. शुक्र आणि नेपच्यून युती ही सामान्यपणे उत्तम कलाप्रेम , उत्तम रसिकता देणारी तसेच विलक्षण कल्पनाशक्तीतून एखाद्या कलेत प्राविण्य देणारी असते. अशा व्यक्ती जास्त भावनाशील असल्या तरी प्रेमळ आणि लाघवी असतात. या सप्ताहात होणार्‍या शुक्र-नेपच्यून युतीवर अमावस्येचा प्रभाव असणार आहे. त्यामुळे ही युती काही विपरीत फलिते देऊ शकते.भावनेच्या अतिरेकामुळे क्षुल्लक कारणाने देखील या व्यक्ती निराश होण्याची आहे. अमावस्येच्या प्रभावामुळे उत्तम कल्पना शक्तीचे रुपांतर  स्वप्नाळू पणात होऊ शकते. त्यामुळे कृतीपेक्षा कल्पनेतील ध्येयाचा पगडा यांच्यावर जास्त राहील. कुंडलीतील स्थानाप्रमाणे काल्पनिक चिंतेने ग्रासले जाणे, अपेक्षा भंग होणे, व्यावहारिक अथवा कौटुंबिक फसगत होणे, लोकापवाद निर्माण होणे अशा प्रकारची विपरीत फलिते ही युती देऊ शकेल. सप्ताहाच्या प्रारंभाला होणारी रवी आणि बुध यांची बुद्धिमत्तेचे वरदान ठरणारी  युती याच अमावास्येच्या प्रभावात चिडखोरपणा, वाममार्गाला नेणारी बुद्धी, कुटिल आचरण करवणारी बुद्धी अशा सारखी विपरीत फलिते देऊ शकेल.  सप्ताहात  वृषभ, मिथुन, तूळ आणि मकर या राशींना हे सर्व ग्रहयोग एकत्रितपणे सामान्य फलिते देतील तर मेष, सिंह आणि मीन या राशींना मानसिक आणि शारीरिक अस्वास्थ्याच्या  दृष्टीने ताण निर्माण करणारी फले देतील.

 

मेष- हौसेमौजेसाठी खर्च होतील

 

सप्ताहाचा प्रारंभ प्रवास योगाचा आहे. प्रवास आनंदाचे आणि उत्कंठावर्धक राहतील. रवी-बुध युती व्यावसायिक जीवनात संभ्रम निर्माण करतील. हौस मौजेसाठी मनसोक्त खर्च होतील. नोकरदारांना अनुकूल वातावरण लाभेल. भावनातिरेक आणि संवेदनशील प्रसंगातून प्रेमात गुरफटले जाल. प्रेमाच्या अवास्तव कल्पनेत हरवून जाल. उत्तरार्ध कर्तृत्वाला प्रोत्साहन देणारा असला तरी मानापमानाच्या तीव्र संवेदनांमुळे प्रतिष्ठेच्या प्रश्नांवर अडून रहाल. सप्ताहांतीची अमावस्या नैराश्य आणि वैषम्य मिर्माण करणार्‍या घटनांची राहील.

 

वृषभ- लोकप्रियता लाभेल

 

व्यर्थ खर्चाचा मनस्ताप होईल. कौटुंबिक आघाडीवर मतभेद आणि विरोधातून मनस्तापाचे प्रसंग येतील. बौद्धिक क्षेत्रात किंवा बँकिंग क्षेत्रात प्रशंसायोग्य कामगिरी होईल. दैनंदिन जीवनात आर्थिक सहजता लाभेल. तरुणाई भावनोत्कट प्रेमाची अनुभूती घेईल. कलाकारांची नाविन्यपूर्ण कला निर्मिती रसिकांच्या हृदयाला भिडेल. मित्रमंडळी आणि आप्तेष्ट यांच्या माध्यमातून लोकप्रियता लाभेल. अंतर्मनाचे संकेत वेळोवेळी उपयोगी पडतील. सप्ताहांतीची अमावस्या नावलौकिक आणि आर्थिक स्थैर्य देणारी राहील.

 

मिथुन-भावनिक कृत्यांचा पगडा

 

न्याय अन्यायाच्या संवेदना तीव्र असल्याने वादविवाद होण्याची शक्यता आहे. पती-पत्नीतील कलह टाळण्यासाठी अहंकार दूर सारावा लागेल. सरकारी अधिकारी तसेच वित्त क्षेत्रातील अधिकारी विशेष कामगिरीचे मानकरी ठरतील. अडचणीच्या प्रसंगी सरकारी अधिकार्‍यांची मदत होईल. संभ्रमित मानसिक अवस्थेमुळे मोठे निर्णय चुकीचे ठरण्याची शक्यता आहे. दैनंदिनीवर भावनिक कृत्यांचा पगडा राहील. स्वप्न रंजनात अडकून राहू नका. सप्ताहांती नोकरदारांच्या प्रगतीकारक प्रयत्नांना फारसे यश मिळण्याची शक्यता नाही.

 

कर्क- कौटुंबिक आनंद प्रसंगांचा अनुभव 

 

राशीच्या व्यय स्थानातील मंगळ आग्रही वृत्ती ठेवेल. स्वतःची मते इतरांच्या गळी उतरविण्याचा प्रयत्न कराल. उतावळेपणाने अनेक कामे अर्धवट राहण्याची शक्यता आहे. मानापमान आणि प्रतिष्ठा यांचे महत्त्व वाढेल. गुरु भ्रमण तुमच्या आर्थिक मनोकामना पूर्ण करणारे आहे. पत्नीसोबत कौटुंबिक आनंद प्रसंगांचा अनुभव घ्याल. आध्यात्मिक क्षेत्रात अनुग्रहित व्हाल. मनाच्या अगाध शक्तीचा प्रत्यय देणार्‍या घटना घडतील. धार्मिक स्थळांच्या भेटी घडतील. सप्ताहाच्या शेवटी व्यवसायिक आघाडीवर तडजोडी स्वीकाराव्या लागतील.

 

सिंह- कर्तृत्वाचा सन्मान 

 

तुमच्या प्रयत्नांना यश लाभेल. कर्तृत्वाचा सन्मान होईल. नोकरदार जिद्दीने उद्दिष्टपूर्तीकडे वाटचाल करतील. विरोधकांच्या साठी जशास तसे असे तुमचे धोरण राहील. आग्रही विचारसरणीने एखादे शत्रुत्व मात्र ओढवून घेऊ नका. सुखांच्या मागे धावताना व्यसनाधीनता टाळणे आवश्यक आहे. भावानोद्रेकाच्या प्रभावात एखादी विपरीत कृती हातून होणार नाही याची काळजी घ्या. सप्ताहांतीची अष्टम स्थानातील अमावस्या अनारोग्याची आणि मानसिक संतुलन घालविणारी आहे.

 

कन्या- सार्वजनिक प्रतिष्ठा वाढेल

 

राशीच्या दशमातील मंगळ आणि सप्तम स्थानातील रवी नोकरी आणि उद्योगात अनेक अडथळे आणणारे आहेत. वरिष्ठांशी तीव्र मतभेद होऊ शकतात. निष्कारण होणारे वाद विवाद टाळल्यास गैरसमज टाळू शकता. कौटुंबिक आघाडीवर भावनिक प्रसंगात अडकाल. आपल्या वैवाहिक जोडीदाराचे आरोग्य नाजूक राहील. विविध सार्वजनिक प्रसंगातून प्रतिष्ठा वाढवणार्‍या घटना घडू शकतात. धार्मिक स्थळांना भेटी देण्याचे योग येतील. सप्ताहांतीची अमावस्या घरगुती वातावरण तणावपूर्ण ठेवेल. व्यवसायातील भागीदार मनमानी करेल.

 

तूळ-विचार संतुलित ठेवा

 

अनारोग्य आणि कामातील नैमित्तिक अडथळे यामुळे नोकरदारांची कामे लांबतील. परिस्थितीशी तडजोड करावी लागेल. सरकारी क्षेत्रे आणि वित्त क्षेत्रे अशा क्षेत्रातील अधिकारी वर्ग प्रशंसनीय कामगिरी बजावेल. व्यावसायिक निर्णय घेताना  भावनाप्रधानता टाळा. संतुलित विचारशक्ती योग्य दिशा दाखवेल. नोकरी  आणि उद्योगात कुसंगत कटाक्षाने टाळायला हवी. उत्तरार्धात संततीच्या उपक्रमांबाबत दक्षता बाळगा. सप्ताहाच्या शेवटी येणारी अमावस्या गुप्त शत्रूंच्या कारवायातून मनस्तापाची निदर्शक आहे.

 

वृश्चिक-मनासारखा जोडीदार लाभेल

 

राशीच्या पंचम स्थानातील रवी,बुध,राहू युक्त ग्रहांची गर्दी संततीविषयक समस्या निर्माण करण्याची शक्यता आहे. मुलामुलींचे अनावश्यक धाडस शारीरिक दुखापत करू शकते. आग्रही विचारांना आवर घालायला हवा. गुरु ,शुक्र विवाहेच्छुंचे विवाह करविणारे आहेत. मनासारख्या जोडीदाराचा लाभ होईल. तरुणांना प्रेमात यश लाभेल. गायन-वादन किंवा तत्सम कला क्षेत्रातील कलाकार स्वर्गीय कलेची निर्मिती करतील. सप्ताहाच्या शेवटी दूर जाणार्‍या व्यावसायिक यशाने तुम्ही निराश होण्याची शक्यता आहे.

 

धनु-ऐहिक सुखांचा उपभोग 

 

घरगुती कलहातून ताण तणाव निर्माण होण्याची शक्यता आहे. संसारात मनाविरुद्ध तडजोड करावी लागेल. भागीदारासोबतचा तुमचा समजूतदारपणा व्यर्थ ठरेल. वाहन खरेदीच्या योजना बनतील. वास्तू विषयक समस्यातील गुंता मात्र वाढू शकतो. कलाकारांना प्रसिद्धी आणि प्रशंसा लाभेल. आपल्या समस्यांना भावनिक जोड देणे टाळायला हवे. उत्तरार्ध करमणुकीचा आणि ऐहिक सुखांचा उपभोग घेण्याचा आहे. सप्ताहाच्या शेवटी येणारी अमावस्या कुटुंबातील ज्येेष्ठांचे आरोग्य नाजूक ठेवणारी राहील. नैराश्यजनक प्रसंग घडतील.

 

मकर-कर्तृत्व बहरेल

 

औद्योगिक क्षेत्र, सरकारी क्षेत्र किंवा आर्थिक क्षेत्रे अशा सर्व क्षेत्रातील तुमची कारकीर्द प्रशंसनीय राहील. उद्दिष्टपूर्तीमुळे विविध क्षेत्रांतील अधिकारी सन्मान आणि पुरस्कार प्राप्त करतील. संतती आणि गृहसौख्य मनासारखे लाभल्याने समाधान आणि मानसिक स्थैर्य लाभेल. प्रतिष्ठितांच्या नव्या ओळखी व्यावसायिक जीवनाला दिशा देणार्‍या ठरतील. विवाहेच्छू आणि संतती इच्छूंच्या मनोकामना पूर्णत्वाला जातील. सप्ताहांतीची अमावस्या नव्या संधी देणारी राहील. कर्तृत्व बहरेल आणि प्रतिष्ठा वाढेल.

 

कुंभ-कलात्मक कार्यक्रमांचा आनंद

 

संततीच्या प्रगतीने समाधान वाटेल. तुमची मते त्यांना कदाचित नाही पटली तरी जोखमीची कृत्ये न करण्याचा सल्ला त्यांना अवश्य द्या. आर्थिक स्थिती आणि कौटुंबिक वातावरण स्थिर आणि आनंदी राहील. आप्तेष्टांसोबत खाद्य पेयांचा आस्वाद घ्याल. कलात्मक कार्यक्रमांचा आनंद घेण्याची संधी लाभेल. तरुणाई आदर्श कुटुंबाच्या आणि  विलक्षण स्वर्गीय सुखाच्या कल्पनेत स्वतःला हरवून बसेल. घरगुती जिव्हाळ्याच्या प्रसंगांनी भावूक व्हाल. सप्ताहाच्या शेवटची अमावस्या कौटुंबिक खर्च वाढवणारी किंवा अनवधानातून धननाशाची ठरेल. 

 

मीन-उत्तम कला निर्मिती शक्य

 

मनाविरुद्ध घडणार्‍या प्रसंगांतून मानसिक अस्थिरता वाढेल. भावनांच्या तरलतेतून लेखन, कला, गायन किंवा वादन अशा क्षेत्रात उत्तम कला निर्मिती होणे शक्य आहे. कलेसाठी किंवा उंची खरेदीसाठी बेबंद खर्च करणे टाळायला हवे. दैनंदिन जीवनात मानापमानाच्या संवेदना देखील तीव्र रहातील. योग्य निर्णयासाठी अंतर्मनाचे संकेत महत्वाचे ठरतील. कुटुंबातील साध्या चर्चा देखील तणावपूर्ण वातावरण निर्माण करण्याची शक्यता आहे. सप्ताहांतीची राशीतील अमावस्या नैराश्यपूर्ण प्रसंगांचा सामना करायला लावेल.