News - Daily Kesari

पुणे दूध संघातील गैरव्यवहाराची होणार चौकशी

Samruddhi Dhayagude
07 Jul 2026

अतुल सावे यांचे दोषींवर कारवाईचे आश्वासन

मुंबई : पुणे जिल्हा सहकारी दूध उत्पादक संघातील (कात्रज दूध संघ) कथित गैरव्यवहाराची सखोल चौकशी करून दोषींवर कठोर कारवाई करण्यात यावी, अशी मागणी आमदार योगेश टिळेकर यांनी मंगळवारी विधानसभेत केली. त्यावर सहकार मंत्री अतुल सावे यांनी या प्रकरणाची चौकशी करून दोषी आढळणार्‍यांविरुद्ध नियमानुसार कठोर कारवाई करण्यात येईल, असे आश्वासन दिले.

आमदार टिळेकर यांनी पुणे दूध संघातील आर्थिक व्यवहार, प्रशासकीय निर्णय आणि विविध अनियमिततेबाबत प्रश्न उपस्थित करत सरकारचे लक्ष वेधले. दूध उत्पादक शेतकर्‍यांच्या हिताशी संबंधित संस्थेमध्ये पारदर्शकता राखणे आवश्यक असून, गैरव्यवहार झाल्यास त्याची निष्पक्ष चौकशी होणे गरजेचे असल्याचे त्यांनी नमूद केले.

यावर उत्तर देताना मंत्री अतुल सावे यांनी सरकार या प्रकरणाकडे गांभिर्याने पाहत असून, संबंधित आरोपांची सखोल चौकशी केली जाईल. चौकशीत दोषी आढळणार्‍या अधिकारी किंवा संबंधित व्यक्तींवर सहकार कायद्यानुसार योग्य ती कारवाई करण्यात येईल, असे स्पष्ट केले.