News - Daily Kesari

वाघोलीत प्रचंड पावसांत बस अडकली

Samruddhi Dhayagude
07 Jul 2026

नगर रस्त्यावर १० फूट पाणी ; अग्निशमन दलाकडून प्रवासी सुरक्षित स्थळी

वाघोली : वाघोली परिसरात आज झालेल्या मुसळधार पावसामुळे पूरस्थिती निर्माण झाली असून येथील जनजीवन पूर्णपणे विस्कळित झाले. बऱ्याच रहिवासी इमारतींमध्ये घरात पाणी शिरल्याने मोठे नुकसान झाले आहे. रस्त्यांना नद्यांचे स्वरूप आले असून बरीच वाहने पाण्यात वाहून गेली तर काही अडकून पडली आहेत.

बस मधील प्रवाशांची सुटका

पुणे-नगर महामार्गावरील वाघोली परिसरात घडली. येथे रस्त्यावर तब्बल १० फुटांपेक्षा जास्त पाणी साचल्यामुळे एक प्रवासी बस या पुरात अडकली. बसमध्ये पाणी शिरू लागल्याने प्रवाशांमध्ये प्रचंड भीतीचे वातावरण निर्माण झाले होते. घटनेची माहिती मिळताच अग्निशमन दलाच्या जवानांनी तात्काळ घटनास्थळी धाव घेतली. जवानांनी जीवाची बाजी लावत बोटीच्या साहाय्याने बसमधील सर्व प्रवाशांना सुखरूप बाहेर काढले.

जनजीवन विस्कळित, प्रशासनाचे आवाहन

पावसाचा जोर एवढा मोठा होता की सखल भागातील रस्त्यांना ओढ्यांचे स्वरूप आले होते. प्रशासनाने वाघोली परिसरातील नागरिकांना सुरक्षित स्थळी राहण्याचे आवाहन केले असून, नगर रस्त्यावरील वाहतूक इतर मार्गाने वळवण्यात आली आहे. आपत्कालीन परिस्थिती उद्भवल्यास नागरिकांनी तात्काळ नियंत्रण कक्षाशी संपर्क साधावा, असे आवाहन करण्यात आले आहे.