News - Daily Kesari

देश

आंदोलनासाठी ममता पुन्हा रस्त्यावर

Samruddhi Dhayagude
03 Jun 2026

कोलकाता : पश्चिम बंगाल विधानसभा निवडणुकीनंतरच्या हिंसाचाराच्या निषेधार्थ तृणमूल काँग्रेसच्या सर्वेसर्वा आणि माजी मुख्यमंत्री ममता बॅनर्जी आंदोलनासाठी पुन्हा एकदा रस्त्यावर उतरल्या आहेत.

ममता यांना सत्तेतून पायउतार व्हावे लागले असून सुवेंदू अधिकारी यांच्या नेतृत्वाखाली भाजपचे सरकार आले आहे. तृणमूलचे राष्ट्रीय सरचिटणीस आणि खासदार अभिषेक बॅनर्जी यांना शनिवारी सोनारपूर दौर्‍यात मारहाण करण्यात आली होती. तसेच, त्यांच्यावर दगड, बूट आणि अंडी भिरकावण्यात आली होती. यांसारख्या घटना अनेक ठिकाणी घडल्या असल्याचा तृणमूलचा आरोप आहे. निवडणुकीनंतरच्या हिंसाचाराचा आणि फेरीवाल्यांना हटवण्याच्या कारवाईचा निषेध म्हणून आपण आंदोलनासाठी रस्त्यावर उतरले असल्याचे ममता यांनी सांगितले.

विधानसभा निवडणुकीत पराभवास सामोरे जावे लागले असले तरी आपण तृणमूलच्या कार्यकर्त्यांना वार्‍यावर सोडणार नाही, असे ममता यांनी सांगितले. या सोबतच, भाजपविरोधात तृणमूल लवकरच देशव्यापी कार्यक्रम राबविणार असल्याचे सांगितले.