News - Daily Kesari

विदेश

चाळीस दिवसांनंतर इराकचे आकाश पुन्हा खुले

Samruddhi Dhayagude
09 Apr 2026

हवाई क्षेत्र आणि विमानतळ सुरू

बगदाद : इराकच्या सिव्हिल एव्हिएशन अ‍ॅथॉरिटीने बुधवारी सायंकाळपासून देशाचे हवाई क्षेत्र आणि सर्व आंतरराष्ट्रीय विमानतळ नागरी उड्डाणांसाठी खुले केले.

२८ फेब्रुवारी रोजी अमेरिका-इस्रायल आणि इराण यांच्यात युद्ध सुरू झाल्यानंतर सुरक्षेच्या कारणास्तव इराकने आपले हवाई क्षेत्र बंद केले होते. तब्बल ४० दिवसांच्या प्रदीर्घ प्रतीक्षेनंतर आता इराकवरून आंतरराष्ट्रीय विमान प्रवास पुन्हा सुरू झाला आहे. बंदी घालण्यापूर्वी दररोज साधारणपणे ७५० ते ८५० आंतरराष्ट्रीय विमाने इराकच्या हवाई क्षेत्रातून जात होती. ही बंदी हटवल्यामुळे इराकच्या अर्थव्यवस्थेला आणि जागतिक विमान वाहतूक क्षेत्राला मोठा दिलासा मिळणार आहे.

डोनाल्ड ट्रम्प यांनी इराणसोबत जो दोन आठवड्यांचा युद्धविराम जाहीर केला आहे, त्यामुळेच इराकने हा निर्णय घेतला आहे. या युद्धविरामात पाकिस्तानचे लष्करप्रमुख जनरल असीम मुनीर यांनी केलेली मध्यस्थी निर्णायक ठरली. इराणने होर्मुझची सामुद्रधुनी खुली ठेवण्याचे आणि हल्ले थांबवण्याचे मान्य केल्यामुळे या क्षेत्रातील हवाई प्रवासाचा धोका कमी झाला आहे.

इराण समर्थित इराकी सशस्त्र गटांनीही या दोन आठवड्यांच्या काळात अमेरिकन तळांवरील आपले हल्ले न करण्याचे जाहीर केले आहे.बगदाद, एरबिल आणि इतर प्रमुख विमानतळांचे कामकाज पुन्हा सुरू करण्यासाठी नागरी उड्डाण प्राधिकरणाचे प्रमुख बंगेन रेकानी यांनी हिरवा कंदील दिला आहे. विमान वाहतूक कंपन्यांनी आता इराक मार्गे आपली उड्डाणे पुन्हा नियोजित करण्यास सुरुवात केली आहे. ही घडामोड मध्यपूर्वेतील तणाव निवळण्याच्या दृष्टीने पहिले मोठे पाऊल मानले जात आहे. या युद्धविरामाच्या १५ दिवसांच्या काळात शांततेसाठी आणखी कोणते कायमस्वरूपी तोडगे निघतात, याकडे संपूर्ण जगाचे लक्ष लागले आहे.