News - Daily Kesari

देश

काँग्रेसचे नेते पवन खेडा यांच्या दिल्लीतील घराची झडती

Samruddhi Dhayagude
08 Apr 2026

मुख्यमंत्र्यांच्या पत्नीवर आरोप केल्यामुळे पोलिसांची कारवाई

नवी दिल्ली : आसामचे मुख्यमंत्री हेमंत सर्मा बिस्वा यांच्या पत्नीने पोलिसांत तक्रार दिल्यानंतर पोलिसांनी मंगळवारी काँग्रेसचे नेते पवन खेडा यांच्या दिल्लीतील घराची झडती घेतली. या झडतीचे वर्णन काँग्रेसने चेटकिणीचा शोध असे केले आहे. सर्मा यांच्या पत्नीकडे एकाहून अधिक पासपोर्ट आहेत. तसेच बेनामी मालमत्ता असल्याचा आरोप खेडा यांनी नुकताच केला होता. त्यामुळे या आरोपाची शहानिशा आणि चौकशी आणि घराची झडती घेण्यासाठी पोलिसांचे पथक खेडा यांच्या घरी पोहोचले होते. आसामचे पोलिस महासंचालक दिबज्योती नाथ यांनी सांगितले की, खेडा यांच्या घरात काहीही सापडले नाही. झडतीत एक इलेक्ट्रॉनिक उपकरण जप्त केले आहे. गुन्हेगारी सदृश्य साहित्य सापडले आहे. मात्र, त्याचा तपशील त्यांनी दिला नाही. गुवाहाटी येथील गुन्हे विभागात खेडा यांच्याविरोधात गुन्हा दाखल केला आहे.

दरम्यान, सर्मा यांच्या पत्नी रिंकी भुयान सर्मा यांच्याकडे अनेक पासपोर्ट आणि परदेशात मालमत्ता आहेत. त्याची माहिती मुख्यमंत्र्यांनी निवडणूक प्रतिज्ञापत्रात जाहीर केली नाही, असा आरोप खेडा यांनी केला होता. यानंतर मुख्यमंत्री सर्मा यांनी कायदेशीर कारवाई केली जाईल, असा इशारा रविवारी पत्रकार परिषद घेऊन दिला होता. सूत्रांनी सांगितले की, पोलिसांचे पथक काल सकाळी खेडा यांच्या मध्य दिल्लीतील निजामुद्दीन परिसरातील घरात पोहोचले होते. दोन तासांनंतर ते निघून गेले. काँग्रेसने झडतीवर टीका केली आहे. विधानसभा निवडणुकीसाठी ९ एप्रिल रोजी आसाममध्ये मतदान होत आहे. त्या पार्श्वभूमीवर पोलिसांनी घराची झडती घेत राज्य यंत्रणेचा गैरवापर केला आणि विरोधकांचा आवाज दाबला आहे.

दरम्यान, मुख्यमंत्री सर्मा यांनी खेडा यांनी बनावट कागदपत्रांचा वापर करून कुटुंबावर बेछूट आरोप केले आहेत. यानंतर ते पसार झाले आहेत. त्यांना पातळातून हुडकून काढून त्यांची कसून चौकशी केली जाईल, असेही त्यांनी सांगितले होते. अटक करण्यासाठी पोलिसांचे पथक येत असल्याचे समजताच खेडा यांनी हैदराबादकडे पळ काढला आहे, असेही ते एका सभेत म्हणाले. दरम्यान, पोलिस अधिकार्‍यांनी सांगितले की, खेडा सध्या कोठे आहेत ? याची माहिती नाही. पण, त्यांचा शोध घेतला जात आहे.