News - Daily Kesari

देश

कर्नाटकात मंत्र्यांच्या राजीनाम्यासाठी गोंधळ

Samruddhi Dhayagude
04 Feb 2026

मद्य गैरव्यवहार प्रकरण

बंगळुरू : कर्नाटकातील अबकारी खात्यातील गैरव्यवहार प्रकरणी मंत्री आर. बी. तिम्मापूर याच्या राजीनाम्याची मागणी विरोधी पक्ष भाजप आणि जनता दलाच्या (धर्मनिरपेक्ष) सदस्यांनी विधानसभेत बुधवारी केली. त्यामुळे गोेंधळ उडाला. मद्य परवान्यांचे वाटप आणि अधिकार्‍यांच्या बदल्या प्रकरणात मोठा भ्रष्टाचार झाला आहे, असा आरोप विरोधी पक्षांनी केला आहे.

मंत्री तिम्मापूर यांनी भ्रष्टाचाराचे सर्व आरोप फेटाळून लावले आणि राजीनामा देण्यास नकार दिला त्यामुळे विरोधी पक्षांच्या सदस्यांनी मंगळवारी रात्रभर विधानसभा परिसरात निदर्शने केली. मंत्री आणि त्यांच्या मुलाने मद्य परवाना वाटपात आणि अधिकार्‍यांच्या बदल्यात मोठा भ्रष्टाचार केल्याचा आरोप केला आहे. काल पुन्हा सभागृहाचे कामकाज सुरू झाले. तेव्हा विरोधी पक्षांनी घोषणा दिल्या. तसेच मंत्र्यांच्या राजीनाम्याची मागणी केली. वाइन व्यापारी संघटनेने देखील आरोप केला की, गैरव्यवहार हा सुमारे ६ हजार कोटींचा आहे. या संदर्भातील चित्रफिती प्रसारित झाल्यामुळे खळबळ उडाली असून लोकयुक्तांकडे तक्रार देखील देण्यात आली.