News - Daily Kesari

देश

हिमाचलमध्ये खासगी बस दरीत कोसळली

Samruddhi Dhayagude
10 Jan 2026

नऊ ठार; ४० जखमी

सिमला : हिमाचल प्रदेशाच्या सिरमौर जिल्ह्यात शुक्रवारी प्रवाशांनी भरलेली खासगी बस ५०० फूट दरीत कोसळली. या भीषण अपघातात नऊ जणांचा मृत्यू झाला. तर, पाच जण जखमी आहेत, अशी माहिती पोलिसांनी दिली.

ही दुर्घटना हरिपूरधार परिसरात घडली. अपघातग्रस्त खासगी बस सोलनहून येत होती. ती सिमल्याहून राजगडमार्गे कुपवीकडे निघाली होती. हरिपुरधारजवळ चालकाचे नियंत्रण सुटले आणि बस ५०० फूट दरीत कोसळली. अपघातानंतर स्थानिकांनी घटनास्थळी धाव घेतली. अपघाताची माहिती मिळताच वरिष्ठ पोलिस अधिकारी घटनास्थळी दाखल झाले. अपघातात ९ जणांचा मृत्यू झाला असून ४० जण जखमी आहेत, अशी माहिती संगराहचे उपविभागीय दंडाधिकारी (एसडीएम) सुनील कायथ यांनी दिली. बचाव कार्य युद्धपातळीवर सुरू असून जखमींना संगराह आणि दादहू रुग्णालयात दाखल करण्यात येत आहे, असेही ते म्हणाले.

मुख्यमंत्री सुखविंदर सिंग सुखू यांनी दुर्घटनेबद्दल दुःख व्यक्त केले आहे. जिल्हा प्रशासनाला मृतांच्या नातेवाईकांना सर्वतोपरी मदत करण्याचे आणि जखमींवर सर्वोत्तम वैद्यकीय उपचार करण्याचे निर्देश दिले आहेत, असे त्यांनी सांगितले. या घटनेनंतरची चित्रफित समाज माध्यमावर फिरत आहे. यामध्ये बचावकार्यात अनेक जण गुंतल्याचे दिसत आहे. तसेच, ते जखमींना बाहेर काढताना अथक परिश्रम करताना पाहायला मिळत आहे.