News - Daily Kesari

पिंपळे सौदागरमध्ये हॉटेलच्या वरच्या मजल्यास आग

Wrutuja pandharpure
02 Dec 2025

पिंपरी : पिंपळे सौदागर मधील स्टार बाजार च्या बाजूला असलेल्या हॉटेल रंगला पंजाबच्या वरच्या मजल्यास आग लागली. या ठिकाणी कोचिंग क्लास चालवला जातो. क्लास मधील ४२ विद्यार्थ्यांना तसेच टेरेसवर घाबरून पळालेल्या पाच जणांना अग्निशामक दलाच्या जवानांनी सुरक्षितपणे बाहेर काढले.

सोमवारी दुपारी पावणेतीनच्या सुमारास अग्निशामक दलाला या आगीची वर्दी मिळाली. अग्निशामक दलाच्या चार गाड्या व ४० कर्मचारी त्वरित घटनास्थळी दाखल झाले. उप अग्निशामक अधिकारी गौतम इंगवले, प्रभारी सब ऑफिसर विनायक नाळे, उप अग्निशामक अधिकारी निशिकांत चिपाडे, चार वाहन चालक आणि ४० कर्मचार्‍यांनी तासाभरात ही आग आटोक्यात आणली. व्हेंटिलेशन नसल्याने व जागा अपुरी असल्याने ऑक्सिजन सिलेंडर घालून अग्निशामक दलाच्या जवानांनी काम केले. हॉटेलच्या चौथ्या मजल्यावर शेड मारून कोचिंग क्लास चालवला जात असल्याचे अग्निशामक दलाच्या अधिकार्‍यांनी सांगितले. आगीत अडकलेल्या बेचाळीस विद्यार्थ्यांना अग्निशामक दलाच्या जवानांनी सुरक्षितपणे बाहेर काढले.