News - Daily Kesari

पुण्यातील तपमानात लक्षणीय वाढ

Wrutuja pandharpure
22 Nov 2025

पुणे : शहर आणि उपनगरातील कमाल आणि किमान तपमानात वाढ झाली आहे. त्यामुळे थंडी कमी झाली आहे. हवेतील गारवाही कमी झाला असल्यामुळे दिवसभर ऊन, तर सायंकाळी किचिंत उकाडा जाणवत आहे. वाढलेले तपमान पुढील चार ते पाच दिवस कायम राहणार असल्याचा अंदाज हवामान विभागाने वर्तविला आहे.

मागील काही दिवस शहर आणि उपनगरातील कमाल आणि किमान तपमानात लक्षणीय घट झाली होती. त्यामुळे हवेत गारवा वाढला होता. थंडीत मोठी वाढ झाली होती. वाढलेल्या थंडीमुळे ठिकठिकाणी शेकोट्या पेटल्या होत्या. आता तपमानात वाढ झाल्याने शेकोट्या कमी झाल्या आहेत. पहाटे मात्र शहरात सर्वत्र धुके परत आहे. हवेत गारवा असल्याने सकाळी थंडी जाणवत आहे. सूर्य उगवल्यानंतर मात्र हवेतील गारवा कमी होत आहे. दुपारी ऊन पडत आहे.

शहरात काल ३० अंश कमाल, तर ११ अंश किमान तपमानाची नोंद झाली. येत्या दोन दिवसांत कमाल तपमानात एक अंशाने वाढ होणार आहे, तर किमान तपमानात २ अंशाने वाढ होणार असल्याचा अंदाज आहे. त्यामुळे येत्या गुरूवारपर्यंत तपमान स्थिर राहणार आहे. तपमान स्थिर राहणार असल्यामुळे थंडीतही वाढ होणार नाही. तसेच हवेतील गारव्यातही वाढ होणार नसल्याचा अंदाज वर्तविण्यात आला आहे. त्यामुळे थंडी अनुभवण्यासाठी पुणेकरांना आणखी काही दिवसांची प्रतिक्षा करावी लागणार आहे.

शहरात नोंदले गेलेले किमान तपमान

ठिकाण तपमान

पाषाण १०.९ अंश

शिवाजीनगर ११ अंश

कोरेगावपार्क १५.३ अंश

लाहगाव १५.८ अंश

वडगावशेरी १६.८ अंश