News - Daily Kesari

महाराष्ट्र

संभाजी ब्रिगेडचे प्रदेशाध्यक्ष प्रवीण गायकवाड यांना काळे फासले

Wrutuja pandharpure
14 Jul 2025

अक्कलकोटमधील घटना

सोलापूर, (प्रतिनिधी) : संघटनेच्या नावात छत्रपती संभाजी महाराज यांचा एकेरी उल्लेख आणि श्री स्वामी समर्थ यांचा अनादर केल्याचा आरोप करत शिवधर्म फाऊंडेशनच्या वतीने रविवारी अक्कलकोट येथे संभाजी ब्रिगेडचे प्रदेशाध्यक्ष प्रवीण गायकवाड यांच्या अंगावर काळी शाई टाकून त्यांच्या तोंडाला काळे फासण्यात आले. गायकवाड यांना त्यांच्या मोटारीतून बाहेर ओढून धक्काबुक्कीही झाली. एका नागरी सत्कार आणि मानपत्र कार्यक्रमासाठी प्रमुख पाहुणे म्हणून प्रवीण गायकवाड अक्कलकोटमध्ये आले होते.

गायकवाड यांचा निषेध करीत शिवधर्म फाउंडेशनच्या कार्यकर्त्यांनी घोषणा दिल्या. गायकवाड यांचे हलगीच्या कडकडाटात स्वागत करून त्यांना संयोजक कार्यक्रमाच्या ठिकाणी घेऊन जात असताना शिवधर्म फाउंडेशनच्या कार्यकर्त्यांनी त्यांना वाटेतच अडवून त्यांच्या अंगावर काळी शाई ओतली.

तसेच त्यांच्या चेहर्‍याला काळे फासले. त्यांच्या गाडीची काच फोडण्यात आली. संभाजी ब्रिगेडचे नाव छत्रपती संभाजी महाराज ब्रिगेड असे करणार की नाही, अशी शिवधर्म फाऊंडेशनच्या कार्यकर्त्यांनी विचारणा केली. हा सर्व प्रकार होत असताना सुरुवातीला तेथे पोलीस बंदोबस्तासाठी नव्हते. गोंधळ वाढल्यानंतर पोलीस घटनास्थळावर आले. धर्मवीर संभाजी महाराज आणि श्री स्वामी समर्थांचा जयजयकार करून शिवधर्म फाऊंडेशनचे पदाधिकारी आणि कार्यकर्ते निघून गेले.

सात जणांवर गुन्हा

या घटनेसंदर्भात संभाजी ब्रिगेडचे सोलापूर जिल्हा अध्यक्ष संभाजी भोसले यांनी फिर्याद दिली आहे. त्यावरुन दीपक काटे, किरण साळुंखे (रा. भवानीनगर, ता. इंदापूर), भैय्या ढाणे (भवानीनगर, इंदापूर), कृष्णा क्षीरसागर (कसबा, बारामती), अक्षय चव्हाण (रा. तांदुळवाडी, बारामती), बाबू बिहारी (रा. तांदुळवाडी, बारामती) भवानेश्वर भगवान

(इंदापूर) यांच्यावर अक्कलकोट उत्तर पोलीस ठाण्यामध्ये गुन्हा नोंदविण्यात आला आहे.