News - Daily Kesari

त्रिशुंड गणपती मंदिर गुरुपौर्णिमेनिमित्त दर्शनासाठी खुले

Wrutuja pandharpure
11 Jul 2025

पुणे : गुरुपौर्णिमेनिमित्त सोमवार पेठेतील श्री त्रिशुंड गणपती मंदिर दर्शनासाठी खुले करण्यात आले होते. त्यामुळे मंदिरातील त्रिशुंड गणेशमूर्तीसह मंदिराच्या तळघरातील दलपतगिरी गोसावी यांच्या समाधीचे हजारो भाविकांनी गुरूवारी दर्शन घेतले.

श्री त्रिशुंड गणपती मंदिराच्या तळघरात दलपतगिरी गोसावी यांची समाधी आहे. वर्षातून एकदाच गुरुपौर्णिमेच्या दिवशी भाविकांना समाधीचे दर्शन घेता येते. सकाळी सहा वाजल्यापासून भाविकांनी दर्शनासाठी गर्दी केली होती. दर्शनाठी भाविकांची लांबच लांब रांग लागली होती. मंदिर रात्री बारा वाजेपर्यंत दर्शनासाठी खुले होते. रात्री उशिरापर्यंत दर्शनासाठी भक्तांच्या रांगा कायम होत्या. अशी माहिती श्री त्रिशुंड मयूरेश्वर गणपती विजय मंडळ ट्रस्टचे सचिन पवार यांनी दिली.

ऐतिहासिक महत्त्व असलेल्या श्री त्रिशुंड गणेश मंदिराची वास्तुशैली वेगळी आहे. वेरूळच्या कोरीव लेणीसदृश्य मंदिराची उभारणी करण्यात आली आहे. श्री त्रिशुंड गणेशाची मूर्ती महाराष्ट्रात क्वचितच आढळते. या मंदिराच्या निर्मितीमागे शिवमंदिराची कल्पना असल्यामुळे याची शैली शिवमंदिराप्रमाणे आहे. या मंदिरातील ऐतिहासिक नोंदीनुसार इंदूरजवळ असलेल्या धामपूर येथील संपन्न गोसावी भीमगिरजी यांनी २६ ऑगस्ट १७५४ मध्ये या मंदिराची निर्मिती केली. तळघरात जिवंत झरा असल्यामुळे येथे पाणी भरते. दरवर्षी गुरुपौर्णिमेनिमित्त तळघर स्वच्छ करून भाविकांसाठी दर्शनासाठी खुले करण्यात येते.