News - Daily Kesari

विदेश

जगप्रसिद्ध हार्वर्ड विद्यापीठाचा २.२ अब्ज डॉलर्सचा निधी रोखला

Samruddhi Dhayagude
15 Apr 2025

अमेरिकेचे अध्यक्ष डोनाल्ड ट्रम्प यांनी सत्तेत आल्यापासून घेतलेल्या बऱ्याच निर्णयांमुळे जगाला धक्के बसत आहेत. ट्रम्प यांनी देशातील नागरिकांना देखील धक्के दिले आहेत. देशांतर्गत कारभारात त्यांनी काही मोठे निर्णय घेतले. आता ट्रम्प प्रशासनाने अमेरिकेतील हार्वर्ड विद्यापीठाला दिले जाणारे २.२ अब्ज अमेरिकन डॉलर्सहून अधिक अनुदान गोठवले. विद्यापीठाने व्हाइट हाऊसच्या काही मागण्या पूर्ण करण्यास नकार दिला होता. विद्यापीठातील विद्रोही विचारांना आळा घालण्यासंदर्भात ट्रम्प प्रशासनाने दिलेले आदेश विद्यापीठाने नाकारले होते. त्यामुळेच ट्रम्प प्रशासनाने विद्यापीठाविरोधात आक्रमक पाऊल उचलले आहे.

हार्वर्ड विद्यापीठाने सोमवारी (१४ एप्रिल) जाहीर केले होते की, व्हाइट हाउसने केलेल्या मागण्या पूर्ण करण्यासाठी विद्यापीठाच्या धोरणांमध्ये बदल केला जाणार नाही. व्हाइट हाउसने शुक्रवारी (११ एप्रिल) विद्यापीठाला एक पत्र पाठवले होते. त्यामध्ये ट्रम्प प्रशासनाने विद्यापीठाच्या नेतृत्व बदलाचे आवाहन केले होते. ट्रम्प प्रशासनाने हार्वर्ड विद्यापीठाला सांगितले होते की, विद्यापीठावर त्यांच्या अभ्यास मंडळाचे, प्राध्यापकांचे व नेतृत्वाचे लक्ष असून ‘गुणधर्मावर आधारित प्रवेश’ आणि भरती धोरणांचे ऑडिट करण्याची आवश्यकता लादली जाईल. तसेच फेस मास्कवर बंदी घालण्याची मागणीही प्रशासनाकडून करण्यात आली होती.

संघराज्याचे अतिक्रमण स्वीकारार्ह नाही : हार्वर्ड विद्यापीठ

ट्रम्प प्रशासनाच्या पत्राला उत्तर देताना हार्वर्ड विद्यापीठाचे प्रमुख अ‍ॅलन गार्बर म्हणाले, “विद्यापीठ स्वतःच्या स्वातंत्र्याबाबत, संवैधानिक अधिकारांबाबत तडजोड करणार नाही. गार्बर यांनी विद्यापीठ भेदभाव दूर करण्यासाठी वचनबद्द आहे. तसेच विद्यापीठ शैक्षणिक स्वायत्तेत संघराज्याचे अतिक्रमण नाकारत आहे.” ट्रम्प प्रशासनाने हार्वर्ड विद्यापीठ व या विद्यापीठाशी संलग्न संस्थांना दिल्या जाणाऱ्या ९ अब्ज डॉलर्सच्या निधीबाबातचा प्राथमिक आढावा घेतल्यानंतर गार्बर यांनी हे वक्तव्य केले.